Македонските земјоделци стравуваат дека при новата распределба на 15.000 хектари земјоделско земјиште во источна и во централна Македонија, за која веќе е завршен конкурсот и се собрани понудите, ќе се повтори светиниколското сценарио.

Македонските земјоделци стравуваат дека при новата распределба на 15.000 хектари земјоделско земјиште во источна и во централна Македонија, за која веќе е завршен конкурсот и се собрани понудите, ќе се повтори светиниколското сценарио. Како и во Свети Николе, и на овој конкурс право да конкурираат имаат само триста регистрирани земјоделци и сите бизнисмени. Нив особено ги загрижува тоа што земјиштето се изнајмува на 30 години, што, според нив, е грешка што тешко може да се исправи.

– Тоа за нас ќе биде катастрофа. Дали е потребно да се пролее крв, па Министерството за земјоделство да сфати дека земјата за земјоделецот е нешто свето и дека нема така лесно да се откаже од неа – велат огорчено во Федерацијата на македонските фармери.

По објавувањето на огласот Федерацијата реагираше на критериумите на конкурсот за добивање земја под закуп.

– Се плашам дека ќе се повтори светиниколското сценарио. Веќе се најавени блокади во Штип и речиси во сите градови за кои се однесува огласот. Министерството се правда дека работи законски, се прашувам каков е тој закон што не одговара за 90 отсто од земјоделците. И ако веќе толку го почитуваат законот, зошто не им ја одземат земјата на оние што ја немаат платено закупнината? Располагаме со податоци според кои наплатата на закупнината за државното земјиште е само еден отсто! Доколку бизнисмените што ја имаат земјата ја платат закупнината, во ресорното министерство ќе влезат 6 милиони евра, а ние молиме тие пари да ги добиеме како помош за пченицата – вели Ефтим Шаклев, претседател на македонските фармери.

Најголемата грешка, според нив, е тоа што земјата се доделува на 30 години. Симптоматично за нив е и зошто се брза со распределбата, без претходно да се извршат класификација и реорганизација на земјоделското земјиште.

– На бизнисмените што ја добиваат земјата, а немаат ништо заедничко со земјоделството не им е важно каква земја добиваат туку колку хектари. Колку повеќе толку подобро, зашто кога ќе станеме придружна членка на ЕУ ќе им бидат достапни фондовите за унапредување на земјоделството. На тој начин ќе можат да користат и многу поволни кредити со долг грејс-период и ниски камати. Во Словенија, на пример, се даваат по 20 илјада евра за една фарма – вели Шаклев.

Според федерацијата, последниот распишан оглас е крајно нетранспарентен, а тоа остава простор за шпекулации од типот дека земјата главно ќе ја добијат Албанци.

– Затоа ние бараме отворањето на понудите да биде јавно или да има наши претставници во комисијата што одлучува кој ќе добие земја под закуп. Досега, за жал, не само што немаме одговор на овие барања туку не знаеме ни кога ќе се отвораат понудите и кога ќе се објави кој го добил земјиштето. Ако Владата во најскоро време не ги промени своите ставови, ќе имаме земјоделци без земја и села без селани – предупредува Шаклев.

Л.Н