Медицинскиот факултет при УКИМ има 41 случај на вработување благодарение на роднински врски, рече денеска директорот на Државниот просветен инспекторат Џорџе Арсов, по направените инспекции

Инспекциските контроли, освен на Факултетот по медицина, утврдиле неправилности и на 11 други факултети, меѓу кои установиле вработување со роднински врски во 12 случаи на Машинскиот факултет, осум случаи на Стоматолошкиот факултет, четири на Електро-техничкиот факултет итн. „Ние овие денови поминавме 12 факултети од УКИМ, и контролиравме повеќе работи согласно законот, а паднаа во очи ова, дека има факултети каде драстично не се почитуваат законите, најчесто со вработување од страна на таткото на синот или ќерката, па има и случаи истовремено и синот и ќерката и снаата и зетот итн,“ рече Арсов. Другиот поголем проблем кој е установен на терен од страна на Државниот просветен инспекторат е немањето евиденција за тоа дали се држат предавања од страна на професорите. „Кај нас стигаат многу жалби дека на одредени факултети воопшто не се држат предавања, асистенти, па дури и демонстратори ги држат предавањата иако факултетите плаќаат квалитетни професорски кадри за тоа,“ изјави Арсов. Министерот за образование и наука, Никола Тодоров вели дека моментално едноставно не постои систем за евиденција на одржување на часовите. „Веќе подолго време имаме сериозни поплаки од студентите и родителите и заради тоа се одлучивме да направиме ваков инспекциски надзор и да ја констатираме фактичката состојба, затоа што на ниту еден факултет кој досега го посетивме нема воспоставено евиденција за реализација на наставата,“ рече Тодоров. Тој смета дека овие две работи, немањето евиденција за реализација на наставата и констатираните семејни врски сериозно влијаат врз квалитетот на високото образование и поради ова од наредниот период Министерството ќе излезе со предлог за законски измени на законот за високо образование со цел ставање на крај на овие нефункционалности кои повеќе децении егзистираат во Македонија. „Сметам дека со оваа контрола и понатамошните активности кои ќе ги направи Министерството ќе им овозможиме навистина на најдобрите студенти да се вработат и бават со наука, а не тие кои имаат најдобри врски,“ рече Арсов. Министерот Тодоров рече дека за жал неговото Министерство нема можност никого  да санкционира за вработувањето на роднини по факултетите бидејќи законот не му го дава тоа право. „Министерството нема можност за санкционирање на семејните врски, но имаме обврска за менување на законските норми и да спречиме ова понатаму да се случува,“ рече тој и најави тесна соработка со Антикорупциската комисија за овие случаи. Државниот просветен инспекторат најави инспекции и по останатите факултети на УКИМ, како и на универзитетот „Гоце Делчев“, универзитетот Св. Климент Охридски, и сите останати универзитети во Македонија.