Челникот на Врховниот совет на вооружените сили на Египет, фелдмаршалот Абдел Фатах ал-Сиси во телевизиското обраќање во средата навечер објави дека се кандидира на претседателските избори распишани оваа пролет и вети дека „Египет ќе го исчисти од тероризмот”.

Фелдмаршалот Абдел Фатех ал-Сиси е еден од највлијателните и најпопуларни челници во Египет. Според аналитичарите, тој има и најмногу шанси за победа на претстојните претседателски избори во најнаселената арапската земја.

Сиси до средата навечер беше врховен воен командант, министер за одбрана и потпретседател на преодната влада. За да може да се кандидира на претседателските избори мораше да поднесе оставки на тие функции.

„Стојам последен пат пред вас во воена униформа, откако решив да поднесам оставки на моите должности министер и воен командант”, изјави ал-Сиси во обраќањето.

„Со сета понизност се кандидирам за египетски претседател”, додал маршалот ветувајќи дека „и натаму секојдневно ќе се бори за Египет без тероризам”.

Египетската армија кон крајот на јануари побара од 59-годишниот ал-Сиси, командант на Врховниот совет на вооружените сили да се кандидира на претседателските избори. За тоа е неопходно да поднесе оставка на функцијата за да може и официјално да ја поднесе претседателската кандидатура. Се очекува на досегашната должност да го замени началникот на генералштабот , генералот Седки.

Сиси, кој беше именуван за министер на одбраната од исламистичкиот претседател Мохамад Морси, кој беше првиот египетски челник избран на избори во историјата, како командант на влијателната армија во јули 2013 година на Морси му соопшти дека армијата го отстранува од функцијата. Претходно воениот врв на Египет му даде тридневен ултиматум на претседателот кој дојде на власт со поддршката на Муслиманското братство и другите исламистички парти, да започне преговори со секуларната опозиција којашто со месеци протестираше против одлуката на Морси да преземе најголем дел од овластувањата кои ги имаа судовите, како и против воведувањето на строгите шеријатски прописи во новиот египетски устав, што го толкуваа како укинување на човековите права и слободата на говорот.

Ал-Сиси е многу популарен меѓу Египќаните кои ја поздравија одлуката на армијата за отстранување на Морси од власта, кога доби поддршка и од некои исламски клерици и партии. Меѓутоа, има голем број противници од редовите на распространетото движење Муслиманско братство, кое во меѓувреме беше прогласено за терористичка организација, кои токму него го сметаат за најодговорен за соборувањето на поранешниот претседател.

Новите египетски власти тврдат дека водат „војна против тероризмот”, откако припадниците на безбедносните сили често по соборувањето на Морси се цел на терористички напади на исламистичките милитанти, а истовремено се спроведува и прогон кон припадницте на Муслиманските браќа, во кој според Amnesty International, вкупно со судирите од минатата година загинале околу 1.400 луѓе. Исто така, започнати се и масовни судски процеси против припадниците на исламистичкото движење, а изминатиот викенд повее до 550 во еден процес беа осудени на смртни казни./крај/мф/сн