Скопското Јавно обвинителство потврди дека работи на обемниот предмет доставен од УЈП
Неофицијално, за овој случај сигурно ќе се поведе истрага, што се очекува во почетокот на идната недела

Скопското Јавно обвинителство потврди дека работи на обемниот предмет доставен од УЈП

Неофицијално, за овој случај сигурно ќе се поведе истрага, што се очекува во почетокот на идната недела

НИНА НИНЕСКА-ФИДАНОСКА

Даночно затајување во износ од еден милион евра е најновото дело за кое се товари холдингот ОРКА, во кривичната пријава што ја заработија неговите сопственици од Управата за јавни приходи. Извори од скопското Јавно обвинителство вчера официјално потврдија дека против Орце Камчев и неговиот татко Илија Камчев, пред неколку дена е доставена кривична пријава по повеќе основи од страна на УЈП.

Веднаш по информацијата за кривичната пријава, вчера со свое соопштение до јавноста експресно излезе и холдингот ОРКА. Во дописот, кој е потпишан од извршниот директор Илија Камчев, се нагласува дека овие обвинувања што се пласираат во јавните гласила се чисти невистини, како и дека се тие продолжение на хајката која против компанијата се води веќе три години од поединци од Министерството за финансии.

Во Обвинителството единствено објаснуваат дека станува збор за обемен предмет, па ќе биде потребен извесен период додека се обработи. Случајот сега Ј е предаден на работа на една заменичка на обвинителот.

Сепак, неофицијални извори тврдат дека истрага за овој случај сигурно ќе биде поведена, со оглед што постојат доволно релевантни докази, што значи дека надлежните од ОРКА ќе мора да одговараат за даночно затајување. Како што се дознава, покрај пријавата, до Обвинителството била доставена и “огромна кутија со докази и материјали”, за стореното дело.

Се очекува дека одлуката за поведување истрага Обвинителството ќе ја донесе во почетокот на идната недела. Иако предметот е обемен, ќе се направат напори, во интерес на јавноста, тој што побргу да се обработи.

Како што неофицијално се дознава, во даночното затајување од еден милион евра, дел се однесува за неплатен данок, а помал износ е за неоснован поврат на ДДВ, за претходните години. Кај делот затајување даноци, УЈП наводно имала наоди дека при изградбата на некои објекти од страна на сопствениците на овој холдинг, не бил пресметуван и уплаќан данокот согласно со законските прописи. За сомневањата, пак, за неоснован поврат на ДДВ, тоа се вршело во соработка со други компании, со кои холдингот бил во деловни односи. Се зборува дека во случајот се вмешани дури 40-ина други фирми, кои се познати имиња, но засега не се објавуваат. Имено, бил баран поврат на ДДВ за стока фактурирана фиктивно на овие компании, иако тие фирми претходно не го платиле данокот на додадена вредност.

Управата за јавни приходи лаже. Против мене не е поднесена кривична пријава, туку има само записник на УЈП за плаќањето даноци. Инаку, јас не сум менаџер, туку само акционер во ОРКА”. Ова беше првата реакција на Орце Камчев за “Утрински”, на прашањето како ја коментира пријавата. Потоа следуваше и официјално соопштение, во кое се вели дека за оваа компанија континуирано се искажуваат невистинити податоци, кои се фрапантни за јавноста и имаат една единствена-цел да се дискредитира угледот на најголемата приватна компанија, која вработува 1.200 работници во сите свои деловни единици, како и менаџерскиот тим.

“Јавно ја прашуваме УЈП дали сите даночни записници на сите даночни обврзници се објавуваат во медиумите, пред да има правосилна судска одлука? Дали ова не е притисок врз Јавното обвинителство и независното судство? Дали некој во УЈП ќе одговара за шпекулантските изјави цитирани во медиумите? Зошто во Министерството за финансии никој не одговара на жалбата на ОРКА од 10 јануари 2005 година, врз основа на записникот и зошто за неа молчи 90 дена, кога законскиот рок за одговор е 60 дена”, потенцираат во холдингот. Оттаму уште и енергично додаваат дека ниту ресорот за финансии, ниту УЈП, нема да можат да ја уништат нивната компанија. Сите медиуми, пак, се покануваат да дојдат во фирмата и да ги погледнат записниците, решенијата и бројките, пред да ги објават во јавноста.

Инаку, ова е втор пат да биде поднесена кривична пријава за даночно затајување против оваа компанија. Првиот пат се работеше за незаконски поврат на ДДВ преку фирми-ќерки кои потоа се ставале намерно во стечај, за износ од околу два милиона евра. За тој случај “падна” тогашниот директор на скопската УЈП, Сезаир Реџепаѓик. Сега тие пријави се наоѓаат во судовите и се работи на истрага за нивно целосно расветлување.