Министерот за одбрана на Република Македонија, Талат Џафери, во вторникот во Домот на АРМ презентираше студија за континуирано унапредување на родовата рамноправност и перспектива во Армијата и положбата на жената во вооружените сили, а со цел да се променат досегашните стереотипите дека војската е машка професија.

Ова е процес со кој ќе се обезбеди отстранување на сите бариери за талентираните и квалификувани жени во однос на нивната желба, потреба и подготвеност за припадност на воената служба, истакна министерот за одбрана.

„Во изминатиот период моите претходници и јас вложивме значителни напори во јакнењето на капацитетите на механизмите за родова рамноправност, подобрување на условите за поефикасно привлекување, вработување и задржување на жените, што подразбира сензитивизација на припадниците и припадничките на вооружените сили за прашања од областа на родовата рамноправност“, рече министерот пред претставниците на УНДП, на Клирингхаусот на Југоисточна и Источна Европа за контрола на лесното вооружување, како и членови на регионалната работна група.

Воедно министерот Џафери посочи дека и покрај тоа што е постигнат голем напредок, министерствата и вооружените сили сè уште се соочуваат со низа предизвици, кои постепено ќе се надминуваат во периодот кој претстои. Токму студијата, додаде министерот, ќе ни послужи како одлична основа при донесувањето на одлуките во однос на целосната примена на Резолуцијата 1325 на Советот за безбедност на ООН.

Според заменикот на постојаниот претставник на УНДП во Скопје, Алесандро Фрачасети, застапеноста на жените во рамки на армиите на државите во Западен Балкан се движи од 6 до 9 проценти, и тоа главно на цивилни, медицински и административни позиции.

Иван Звержановски, координаторот на Клирингхаусот на Југоисточна и Источна Европа за контрола на лесното вооружување, пак, посочи дека сè уште постојат скриени бариери за развој на кариерите на жените во вооружените сили, но нивното детектирање овозможува и изнаоѓање на соодветни ефикасни решенија.

Целта на проектот од кој произлегува студијата е интегрирање на прашањата од областа на родовата рамноправност во процесот на реформа на секторот безбедност, со што ќе се придонесе кон негова поголема ефикасност, особено во овој регион./крај/мф/ап