Македонија
Околу 350 доверители побаруваат 24 милиони евра од А1 телевизија
Домашни и странски компании, новинари и актери се појавија денеска како доверители на испитното рочиште на собранието за доверители за А1 телевизија.
Домашни и странски компании, новинари и актери се појавија денеска како доверители на испитното рочиште на собранието за доверители за А1 телевизија.
Меѓу нив се и Маре Стоилова поранешна дописничка во А1 телевизија, но и шест актери Марин Бабиќ, Марија Кондовска, Диме Илиев, Лазе Манасков, Трајанка Илиева и Атанас Таневски, кои работеа на синхронизација на турската серија „Шехерезад“.
Кај стечајниот управник на А1 телевизија, Ацо Петров во предвидениот рок се пријавиле вкупно 350 доверители со вкупни побарувања од 24 милиони евра.
Поранешната дописничка на А1 телевизија, Стоилова, која ја тужела А1, вели дека телевизијата и’ должи едно големо извинување бидејќи тврделе дека никогаш не работела таму. Стоилова морала да набавува преку интернет документи за да потврди пред судот дека работела таму.
„Ми должат едно огромно извинување за компромитација на мојата личност, а и јас им должам извинување затоа што не заслужував да работам во А1, бидејќи таму требаше да работи новинар кој добро истражува, а јас никогаш не истражив и не дознав навреме дека не сум била новинар кој е соодветно платен и третиран како работник. Јас бев многу горделива и напуштив. Затоа што напуштив, Велија кажа дека неговиот збор ќе биде последен. Потоа зборуваше дека сум барала рекет, сум имала преголемо задолжување за гориво. Ги собираа луѓето од селата и ги мамеа за тутунарската револуција и на крај за тоа гориво требаше ние да платиме“, вели Стоилова.
Три ипол години се водела судската постапка меѓу Стоилова и А1 телевизија. Според конечната судска пресуда, Стоилова треба да наплати од А1, еден милион денари.
„Не верувам дека и тоа ќе го добијам. Материјалната сатисфакција не ми е битна, но битно ми е што зборот на судот остана последен, а не на Рамковски“, рече Стоилова.
Собранието на доверители денеска беше одложено по барање на стечајниот управник, Ацо Петров поради големиот број на стигнати пријави од страна на доверители и обемната документација која ја доставиле. Петров до 28 ноември треба да ја изготви табелата со побарувањата на доверителите. Околу 250 од вработените во А1 телевизија се јавиле како доверители.
„Рано е да се каже колкави се шансите, колку вработените ќе бидат обештетени. Сите доверители имаат исти третман, освен државата и НЛБ Тутунска банка, коишто согласно Законот за стечај имаат приоритетни побарувања, Тутунска банка има побарување обезбедено со залог којшто е воспоставен пред отворањето на стечајната постапка. Државата побарува 670 милиони денари“, изјави Петров.
Како најголеми доверители се јавуваат Управата за јавниот приходи и НЛБ Тутунска банка, а покрај нив пријавени се ПИОМ, Македонски телеком, Т-хоме, Град Скопје, ЈП „Комунална хигиена“, ЕВН Македонија, како и странски фирми, повеќето од Србија, но и „Ворнер Брос Продукција“ од Лос Анџелес./крај/фф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Ќе се забрани пристапот до 100 странски онлајн коцкарници кои се користат кај нас, Андоновски алармира дека се вклучени малолетници
Откако беа згаснати домашните онлајн коцкарници кои нелегално приредуваа игри на среќа, министерот за дигитална трансформација Стефан Андоновски најави дека ќе го забранат пристапот до веб- страниците регистрирани во странство кои кај нас нелегално организираат игри на среќа. Забраната за веб-страниците регистрирани во странство е втора фаза од справувањето со нелегалното онлајн обложување за што Министерството за дигитална трансформација, Агенцијата за електронски комуникации, МАРНЕТ и Лотарија на Македонија веќе имале состанок и ги утврдиле конкретните чекори.
„ Во Лотарија на Македонија веќе се прваат табели кои утврдуваат кои точно страници се најприсутни и каде најмногу се закачени нашите граѓани, на кои веб-страници најмногу се приредуваат тие нелегални игри на среќа. Страшниот дел е што многу малолетници се вклучени. Во моментов се стотина странски веб-страници, но најкористени се две до три кои претпоставувам сите ги знаете. Мислам дека во првата фаза ќе треба да се работи овие 100 да се забранат, а пoтоа ова ќе биде континуиран процес. Не може да се направи еднаш засекогаш туку постојано треба да се ажурира оваа листа и постојано да се информираат АЕК и телеком операторите дека нешто се случува за да може постојано да се движат кон забрана на овие нелегални приредувачи на среќа. Ако тие беа регистрирани во Македонија, ова е кривично дело што го прават, но затоа што се регистирирани во странство не може да се стигне до тоа кој точно е приредувачот, затоа мора да одиме со забрана на пристапот“, рече министерот Андоновски.
Законот за електронски комуникации дозволува на Агенцијата за електронски комуникации да ги задолжи телекомите да забранат пристап до одредени веб-страници ако тие се во спротивност со Законот за електронски комуникации или ако се спротивни на други закони. Министерот Андоновски вели дека ќе го операционализираат тој дел од законот, оти досега не се користел .
Во наредниот период рече дека ќе излезат со точни податоци за тоа какви активности ќе преземе Министерството за дигитална трансформација и кои се активностите на МАРНЕТ, Агенцијата за електронски комуникации и телеком операторите кај нас.
Онлајн коцкарниците со македонски домеини кои беа згаснати, вклучително и онаа на државната видео-лотарија, ги известија корисниците дека средствата од регистрираните онлајн сметки за коцкање ќе им бидат целосно исплатени.
Министерот Андоновски е задоволен што Владата е обединета и ревноста во справувањето со нелегалното онлајн обложување.
„Причината за ова што го правиме е поради тоа што прво нашите најмлади се зафатени од оваа болест, без никаква контрола. Ниту се знае дали користат туѓи лични карти па се пријавуваат за игра, ниту се знае колку средства користат, ниту се знае каде се излеваат тие средства, ниту се знае за што се користат тие средства понатаму, дали се за финансирање на некои други нелегални активности. Ова е болест на македонското општество која ни се случува. Справувањето со ова ќе биде примарна задача на Владата во наредниот период“, рече министерот Андоновски.
Првиот вицепремиер Изет Меџити од коалицијата Вреди, чие предизборно ветување беше справувањето со коцкањето, најави дека по онлајн коцкањето ќе се справат и со дивите казина низ градовите ширум земјава.
Македонија
(Видео) Пожар во зграда во Чаир, станарите евакуирани, неколкумина побарале лекарска помош оти вдишиле чад
Пожар избувна во подрумски простории во зграда во скопската населба Чаир, а неколкумина станари, пожарникар и полицаец побарале лекарска помош откога вдишиле од чадот.
Според информациите од МВР, пожарот избил синоќа, а противпожарната бригада добила пријава дека огнот се раширил од магацин на неутврдена површина на улицата Прохор Пчински во Скопје.
Пожарот зафатил и продавница, а интервенирале 20 пожарникари со седум противпожарни возила.
Екипите на противпожарната бригада веднаш излегле на терен, а според информациите биле евакуирани околу 100 лица.
Македонија
Тренчевска: 100 дена Влада – платите се намалуваат, се враќа политиката на евтина работна сила
Катастрофални се економските политики на новата влада предводена од Христијан Мицкоски и ВМРО-ДПМНЕ. По само 100 дена власт, резултатите се очигледни – пад на просечната плата, нема поголема минималната плата, има раст на цените и целосна деградација на работниците. Според официјалните податоци на Државниот завод за статистика, просечната плата е намалена за 1.000 денари. Ова е прв пат после седум години постојан раст платите да се намалуваат, вели пратеничката на СДСМ Јована Тренчевска.
„Овој пад значи помалку пари во џебот на секој граѓанин, помалку можности за пристоен живот, и уште потежок удар врз стандардот. СДСМ се бореше и обезбеди постојано зголемување на платите, дури и за време на најголемата економска и здравствена криза. Во 2015 година, во времето на ВМРО-ДПМНЕ, просечната плата беше 20.853 денари. Во времето на СДСМ, таа достигна над 41.000 денари, што покажува континуирана посветеност кон подобрување на животниот стандард. Но, што гледаме денес? Наместо раст, гледаме пад на платите. Нема покачување ниту на минималната плата која требаше да биде 450 евра“, посочува Тренчевска.
Како што вели таа, работниците, кои со години беа заштитени од нашите мерки за покачување на платите, денес се чувствуваат изиграни и разочарани од владата на Мицкоски по само 100 дена.
„Мерките кои ги предлага владата се задоцнети и неефективни. Замрзнувањето на маржите на само 73 производи не донесе никакво олеснување за граѓаните. Додека цените на основните производи продолжуваат да растат, владата на Мицкоски не успева да преземе конкретни чекори за да ги заштити граѓаните од поскапувањето. Ова не е влада што се грижи за граѓаните. Ова е влада која се обидува да ги замајува со 100 изговори. Работниците кои се надеваа на зголемување на платите се длабоко разочарани. Наместо тоа, политиката на евтина работна сила се враќа. Владата на Мицкоски го враќа времето на сиромаштија и понижување на работниците. СДСМ не може да остане нем сведок на оваа ситуација. Ќе се бориме за вистински економски мерки кои ќе го заштитат секое семејство и ќе го гарантира достоинството на работниците“, завршува Тренчевска.