Планинарот од планинарското друштво „Бистра“ Здравко Дејановиќ го освои врвот Еверест, со што стана трет Македонец што во последните три години се искачува на Покривот на светот.

Планинарот од планинарското друштво „Бистра“ Здравко Дејановиќ го освои врвот Еверест, со што стана трет Македонец што во последните три години се искачува на Покривот на светот.

Проектот за освојување на Монт Еверест траел неколку години. Почетната фаза била со освојувањето на Арарат, првата планина над 5.000 метри. Потоа следувале експедициите на Кавказ, Аконкагва и Мустаката.

„Освојувањето на Еверест за мене претставуваше посебен триумф и гордост, но сето тоа ми го помати тажната глетка до врвот. Покрај самата патека што води кон највисоката точка на Хималаите, лежеа тела на планинари, кои не успеале во својата мисија. Во непосредна близина беше и телото на словенечки планинар, кој настрадал во 2006. година. Јас сум емотивен човек и тоа многу ме погоди“, вели 45. годишниот Дејановиќ, кој роденденот го прославил еден ден по големиот успех.

„На 24. мај се искачив на Еверест, а веќе следниот ден прославив роденден заедно со колегите од Црна Гора и Србија“, додава планинарот од ПД „Бистра“.

Според него, качувањето од последниот базен логор кон врвот започнало на 23 мај, по исклучително лоши временски услови, што патувањето од седум часа, го претворило во голгота од 11 часа.

Дејановиќ беше во состав на руска експедиција составена од 12 членови, од кои дури осуммина успеале да се искачат на Еверест. Пристапот бил од северната кинеска страна.

„Условите беа крајно лоши. Падна нов снег од половина метар, а патеката што води кон врвот беше широка одвај 20-30 сантиметри, а некаде и помалку, така што движењето беше крајно ризично. Поради должината на искачувањето, го намаливме и количеството кислород во боците, за да ни трае до крајот на потфатот“, рече Дејановиќ.

Тој додаде дека на самиот врв се задржале десет минути и поради лошото време добиле повик веднаш да се враќаат кон логорот.

„Некаде на половина пат сфатив дека ситуацијата е многу сериозна. Во тие моменти на борба, решив искачувањето да му го посветам на Свети Никола, да ме штити и чува да се искачам на врвот и уште побезбедно да се вратам, бидејќи 80% од смртните случаи на Еверест се случуваат при враќање“, нагласи Дејановиќ.

Тој е третиот Македонец што во последните три години се искачил на Еверест. Лани тоа го направи Сашко Кедев, а една година претходно Глигор Делев, Македонец кој живее и работи во Канада.

Прв во македонската историја што го освои Покривот на светот е Диме Илиевски-Мурато, кој пред 20 години настрада при враќањето од Еверест.

Од ПД „Бистра“ и Федерацијата на планинарските спортови на Македонија се пожалија дека експедицијата на Дејановиќ не била помогната од државата, иако тие побарале финансиска помош од надлежните институции.

„Македонија има прекрасни планини за подготовка на идните планинари што би го освоиле Еверест, но државата воопшто не инвестира во развојот на овој спорт, иако нашите планинари на најдобар начин ја претставуваат земјата надвор“, велат од ПД „Бистра“. /крај/ст