Двајца факултетски професори и селектор на една од македонските национални репрезентации се меѓу 150-те сопственици на автомобили на кои досега МВР им достави поднесок за направен сообраќаен прекршок, регистриран со новите безбедносни камери.

Меѓу најчестите регистрирани прекршоци се оние за погрешно паркирање, но и посериозни прекршоци, како на пример минување преку две полни ленти.

„Казните за ваквите прекршоци изнесуваат од 50 до 300 евра во денарска противвредност, но како што најавивме во наредниот период ќе продолжиме превентивно со предупредување, а не со казнување. Кога ќе стартуваме со казнување наместо предупредувања, во зависност од сериозноста на прекршокот, сопствениците на возилата ќе добиваат Платен налог или Покана за глоба и Записник за сторениот прекршок“, изјави министерот за внатрешни работи, Гордана Јанкуловска.

„Со ваквиот начин на регистрирање на прекршоците се ограничува арбитрарноста на полициските службеници и можноста на прекршителите да им се простува и прогледува низ прсти. Можам да кажам дека меѓу првите на кои досега им беа доставени предупредувања се двајца познати професори на факултети и селектор на една од македонските национални репрезентации“, изјави Јанкуловска.

Камерите досега и помогнале на полицијата да открие и учесници во сообраќајни несреќи со потешки последици кои бегале од местото на настананот, најчесто оставајќи некој повреден без да повикаат медицинска помош.

„Продолжуваме да работиме и натаму на воспоставување на целосна функционалност на системот и поврзување и ставање во работа и на камерите инсталирани во Тетово. За крај само би сакала да апелирам сите учесници во сообраќајот да се придржуваат до правилата и прописите, бидејќи ќе имаме засилено присуство на автопатиштата во текот на летово со оглед на редовното зголемување на фреквенцијата во текот на годишните одмори. Во тој контекст би кажала дека мапата на радарските контроли која ја објавивме минатата година, останува на важност и оваа, а на располагање на возачите е и апликацијата ‘Внимавај радар’ која што ја изготви Министерството за информатичко општество“, изјави Јанкуловска. /крај/со/ач