Министерството за одбрана се откажало од огромните количества муниција и експлозиви што останале како готов производ по продажбата на фабриката „Сувенир“ на грчкиот газда Василиос Пападопулос, потврдија извори на „Време“.

СЕ ПОЗАПЛЕТКАНА ПРОДАЖБАТА НА „СУВЕНИР“

Александар Божиновски

Министерството за одбрана се откажало од огромните количества муниција и експлозиви што останале како готов производ по продажбата на фабриката „Сувенир“ на грчкиот газда Василиос Пападопулос, потврдија извори на „Време“.

Како што објавивме врз основа на документацијата, два и пол тони пластичен експлозив, десет тони барут, околу 10.000 куршуми, близу 740.000 парчиња каписли и уште многу други производи кои не биле предмет на продажбата на „Сувенир“, дополнително му биле продадени на гркот Пападопулос за 10.000 евра. Експертите оваа сума ја оценија како шокантно ниска, анализирајќи дека готовите производи вредат барем 600.000 евра. Самата фабриката била продадена за 500.000 евра.

Но, изворите на „Време“, потврдија дека во Министерството за одбрана била формирана комисија на чело со првиот логистичар Нелко Менкиновски, која утврдила дека производите не и се потребни на Армијата.

Менкиновски, инаку е во притвор како еден од осомничените во случајот „запленето армиско оружје“.

На стечајниот управник, потоа му било побарано сета муниција да им ја даде бесплатно. Ова се случувало во првата половина на минатата година.

Изворите, претпоставуваат дека МО се откажало од овие производи, поради втората листа на која се наведени бомби и експлозиви за уништување. Наводно, уништувањето било многу скапо, а МО не сакале тоа да го платат. Сепак, експертите сметаат дела тие бомби и експлозиви не се толку стари за да не можат да се употребуваат.

Дознаваме дека, првин, Пападопулос понудил само 5 илјади евра за производите, потоа 7 илјади, а на крајот стечајниот управник Тодор Пашоски се исценкал за 10.000 евра, плус ДДВ.

Тој вчера не беше расположен за коментар.

Владо Бучковски, тогашниот премиер, во неофицијален разговор за „Време“ информираше дека во случајот „Сувенир“ имало многу караници меѓу стечајниот управник и грчкиот инвеститор.

Ова ни го потврдија и нашите извори наведувајќи дека Пашоски бил гневен на Пападопулос, затоа што не се придржувал на купопродажниот договор за фабриката, а кој меѓу другото предвидувал реактивирање на линијата за муниција, како и вработување на 120 работници до крајот на минатата година. Ова особено, затоа што стечајниот управник станал мета на неосновани обвинувања за приватизацијата од поранешните вработени, велат изворите.

Пашоски, деновиве ги реализирал своите предупредувања и ја ангажирал ревизорската куќа „Европски ревизорски центар“, која треба да испита дали двете страни се придружувале на купопродажниот договор. Според клаузулите на тој договор, Пападопулос треба да плати казна за неисполнување на одредбите или пак договорот да биде поништен.

Гркот се колнел дека ќе проработи фабриката

Василиос Пападопулос, сопственикот на „Сувенир“, бил на состанок со доверителите и стечајниот судски совет, кој се одржал во понеделникот во Основниот суд во Кичево.

Тој им се колнел на судиите дека фабриката ќе проработи, дека ќе ги вработи работниците. Се правдал дека МВР и Министерството за економија се уште не му ги давале дозволите за работа. „Време“ веќе еден месец се обидува да добие коментар од него.