Владата ќе се обиде за само десетина часа да го избере и да го промовира новиот сопственик на „ЕСМ-дистрибуција“, потврдија од Министерството за економија.

Мирче Котевски

Владата ќе се обиде за само десетина часа да го избере и да го промовира новиот сопственик на „ЕСМ-дистрибуција“, потврдија од Министерството за економија. Откако на 15 март четирите европски компании ќе ги достават своите финансиски понуди и инвестициските планови, веќе наредниот ден Владата ќе го прогласи победникот на тендерот и ќе го потпише купопродажниот договор со него.

Според правните експерти, операцијата што се подготвува е сложена, но и нелогична. Досега во земјава немало случај преку ноќ да се менуваат сопственичките односи во една фирма од стратегиско значење.

– Речиси и не е можно целата постапка, сосе оценувањето на понудите и изборот на новиот сопственик, да заврши во еден ден. Па, не продаваме стар автомобил, туку стопански капацитет од стратегиска важност. Вака, решението за се да се заврши за еден ден може да се разбере и како однапред договорена зделка – вели Слаѓана Тасева, член на Државната комисија за спречување на корупцијата.

Таа вели дека комисијата внимателно ќе го следи целиот процес, а најави дека ќе се испита и комплетната документација поврзана со приватизацијата на ЕСМ.

За Борче Давитковски, професор по управно право на правниот факултет „Јустинијан Први“, некоректно би било доколку некоја од компаниите што би можеле да бидат незадоволни од евалуацијата на понудите не може да поднесе приговор.

– Сите учесници на тендерот се правно заштитени и треба да имаат право на приговори – смета тој.

Професорот на Економскиот факултет Трајко Славевски смета дека технички можеби е изводливо да се изведе операцијата, но вообичаено е на комисијата да и се остави повеќе време за внимателно да ги вреднува понудите. Не е логично, вели тој, да не се остави простор за приговори.

– Сепак, посимптоматично е како е можно во исто време четирите кандидати истовремено да поднесат барање до Владата за одложување на рокот за понуди, и тоа за две недели. Едноставно, конкуренти на ваков тендер никогаш не комуницираат и не се договараат меѓусебно. Затоа може да се оцени дека со таков потег е нарушена тендерската процедура – вели Славевски.

Од Министерството за економија, како координатор на процесот на приватизација, велат дека само со брзо завршување на постапката ќе се тргнат сите сомнежи од можни лобирања од кандидатите. Пресметувањето ќе биде многу едноставно, според формула, а евалуацијата ќе се одвива во присуство на претставници од сите учесници на тендерот.

Во Владата се убедени дека со таква, како што ја нарекуваат, транспарентна постапка, оние што ќе загубат на тендерот нема да имаат потреба од поднесување приговори.