Анализата на ДНК од останките на загинатите во самоубиствениот напад врз коптската црква во Александрија, кои се наоѓале во време на експлозијата во епицентарот, ќе помогне да се утврди идентитетот на сторителите на терористичкиот напад, изјавил денеска полициски извор за локалните медиуми.Според истрагата на судската медицина, во моментов остануваат неидентификувани остатоци од три или четири лица кои биле во епицентарот на експлозијата. Во утврдувањето на идентитетот може да помогне анализа на ДНК на жртвите, која ќе биде направена набрзо. Со оваа процедура египетските власти се надеваат дека ќе дојдат до извршителите на нападот во кој загинаа 21 лице, а стотина беа ранети.Првичните резултати од истрагата укажуваат дека бомбашот-самоубиец прво се обидел да влезе во црквата со што би предизвикал многу повеќе жртви заради мноштвото луѓе кои присуствувале на новогодишната служба. Сепак, присуството на полицијата пред црквата и на плоштадот пред неа, најверојатно го принудило напаѓачот да причека и да го активира експлозивот кога парохјаните излегувале од црквата и се упатиле кон нивните возила на блискиот паркинг.Иследниците веруваат дека сторителот веројатно дошол во Египет од странство под закрила на негови соучесници Египќани, кои се наоѓаат меѓу членовите на локалните екстремистички групи, кои бомбашот го обезбедиле со привремено живеалиште, разработена шема за нападот и му помогнале да ја направи експлозивната направа.Египетското Министерство за внатрешни работи има оперативни информации според кои во земјата има притаено странски државјани кои може да се вмешани во експлозијата. Во моментов, зајакнати се контролите на копнените, морските и воздушните гранични влезови и излези во Египет за да не се дозволи нивно бегство надвор од земјата.Во силната експлозија во новогодишната ноќ пред православната коптска црква „Сите Свети“ во вториот по големина град на Египет, Александрија, загина 21 човек, а околу 100 беа повредени.Веднаш по експлозијата, египетските анти-терористички експерти и официјални претставници на властите укажаа на големата веројатност за странска вмешаност во терористичката акција. Овие податоци ги потврди и Министерството за внатрешни работи.Претходно, екстремни исламистички групи блиски до меѓународната терористичка мрежа Ал Каеда им се заканија на египетските христијани. По овие закани, египетските власти го подигнаа нивото на безбедност во црквите во главниот град Каиро, како и во други градови. /крај/аа/рн/сн