Новиот закон за работни односи го суспендира уставното право на штрајк бидејќи работодавецот може да ги отпушти работниците што ќе ги бранат своите права, велат претставниците на Сојузот на синдикатите на Македонија.

Новиот закон за работни односи го суспендира уставното право на штрајк бидејќи работодавецот може да ги отпушти работниците што ќе ги бранат своите права, велат претставниците на Сојузот на синдикатите на Македонија. Според нив, одредбите на законот се непрецизни, контрадикторни и противуставни. Тие на денешната средба ќе побараат од премиерот Владо Бучковски да ја спречи утрешната постапка во Владата за усвојување на законот се додека не се усогласат ставовите меѓу социјалните партнери. Стевчо Јакимовски, министер за труд и социјална политика, ги оцени забелешките на синдикалците како обични глупости. Синдикалците најавија протести ако Владата ја усвои спорната содржина на предлог-законот за работни односи.

Пеце Груевски, портпарол на ССМ, вели дека повеќе одредби од законот се лошо преведени од законодавствата на Хрватска и некои други земји.

– Законот е изработен нестручно. Се укинува колективниот договор, останува незаконското вработување со договор на дело, не постои задолжителна исплата на плати, а поради лошиот превод има повеќе зборови што се несоодветни за материјата што се регулира во законот – вели Груевски.

Министерот Стевчо Јакимовски смета дека забелешките на синдикалците се неосновани. Тој информира дека на вчерашната седница на Економско- социјалниот совет работодавците позитивно го оцениле новиот закон.

– Советот се согласи со концептот на законот, а работодавците имаа забелешки за правната терминологија. Забелешките на синдикатот дека законот го забранува правото на штрајк, дека се укинува колективното договарање и дека се укинуваат надоместоците се глупости. Законот неоспорно ги регулира овие права – вели Јакимовски.

Синдикалците одбиле да присуствуваат на вчерашната седница на Економско-социјалниот совет бидејќи Јакимовски не го прифатил нивното барање за одложување на состанокот.

– Јакимовски се лаже ако мисли дека една седница од час и половина е доволна за да се усогласат разликите. Неговиот став беше или прифатете го законот каков што е, или текстот и без вашето мислење ќе оди во владина процедура. Владата не смее да му робува на еден министер за толку важно прашање и затоа ќе побараме од премиерот Бучковски да ја спречи постапката пред Владата – вели Пеце Ристески, претседател на синдикатот на металците, енергетичарите и рударите.

Министерот Јакимовски информира дека во законот има околу 40 новини што ги зголемуваат правата на работниците. Тој додаде дека периодот за пробно вработување ќе биде шест месеци, а приправничкиот период ќе биде една година.

Новина во законот е што периодот на платено боледување се намалува од 60 на 21 ден. Со оваа одредба државата го презема товарот од работодавците кога се работи за боледувања подолги од овој период. Со овој предлог не се задоволни ниту Министерството за здравство, ниту работодавците. В. Н.