Свет
Плажите ќе ги дели Министерството за транспорт и врски
Министерот за транспорт и врски треба спогодбено да ги раскине веќе потпишаните договори со Охрид и со Струга и да распише нов тендер за плажите
ВЛАДАТА ДОНЕСЕ НОВА ОДЛУКА ЗА ОХРИДСКОТО КРАЈБРЕЖЈЕ
Министерот за транспорт и врски треба спогодбено да ги раскине веќе потпишаните договори со Охрид и со Струга и да распише нов тендер за плажите
Плажите на охридското крајбрежје место локалната самоуправа, под закуп ќе ги издава Министерството за транспорт и врски, а закупците, доколку не ги уредат плажите со квалитетен песок, санитарни јазли и друга опрема, нема да добијат дозволи за работа. Вака одлучи Владата на последната седница, откако ја разгледа информацијата за незаконитоста на договорите склучени меѓу Република Македонија и општините Струга и Охрид, со кои плажите лани им беа дадени под долготраен закуп од 99 години, без надомест за државата.
На барање на Министерството за транспорт и врски договорите биле анализирани во Јавното правобранителство каде што било утврдено дека тие се спротивни на одредбите од Законот за спречување на корупцијата бидејќи се склучени непосредно по завршување на парламентарните избори. Нив со непосредна спогодба ги склучил поранешниот министер за транспорт и врски Џемали Мехази. Договорот со Охрид бил склучен на 19.07 2006 година, а договорот со Струга на 27.07.2006 година, веднаш по завршувањето на парламентарните избори.
Јавното правобранителство утврдило и дека во документацијата недостигало мислење од Министерството за животна средина за долготрајниот закуп на плажите, кој бил задолжителен. Правобранителството открило дека на склучувањето на договорите не претходел соодветен акт од општините со кој тие официјално ќе ги побараат плажите за потребите на општината. Таков документ во Министерството не бил доставен ниту, пак, Министерството побарало да му се достави, а со склучувањето на договорите прекршен бил и Законот за градежното земјиште кој не дозволува такво земјиште да се даде под долготраен закуп туку само под концесија или под краткотраен закуп.
На последната седница Владата донесе заклучок министерот за транспорт и врски во рок од 15 дена спогодбено да ги раскине договорите со општините Охрид и Струга, а доколку не се раскинат договорите, да побара од Јавното правобранителство нивно поништување. Во рок од 15 дена по раскинувањето или поништувањето на договорите, Министерството за транспорт и врски ќе распише јавен тендер за издавање под краткотраен закуп на конкретни градежни парцели на крајбрежјето на Охридското Езеро.
Министерот за транспорт и врски Миле Јанакиески веќе имал средба со претставници од Општина Охрид на која било договорено спогодбено раскинување на договорот и преземање заеднички активности за распишување на тендерот за плажите.
На овој тендер за давање под закуп нема да бидат понудени крајбрежјата на Преспанското и Дојранското Езеро, како и бреговите на сите останати природни и вештачки езера. Од Министерството велат дека ќе направат анализа за бреговите на другите езера и ќе ја испитаат можноста за да бидат и тие, евентуално, дадени под закуп. (М.И.П.)
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Професорите на Универзитетот во Амстердам протестираа во знак на солидарност со студентите
Наставниот кадар на Универзитетот во Амстердам одржа протест во знак на солидарност со студентите, чии демонстрации против војната во Газа претходно беа насилно расчистени од полициските сили.
Полицијата со булдожер ги урна барикадите и уапси околу 140 демонстранти, а постојано има судири меѓу безбедносните сили и студенти, пренесува Ројтерс.
„Учениците и вработените пријавиле употреба на полициски палки и кучиња, како и булдожери во обид на полицијата насилно да ги отстрани. Поради прекумерната употреба на насилство, луѓето се повредени“, велат од групата Холандски научници за Палестина.
Европа
Венеција заработи огромна сума на пари со наплата на влезници во градот за само 11 дена
Новововедениот билет за туристите на еднодневно патување во Венеција на градот му донесе приход од 975 илјади евра во првите 11 дена од пробниот период.
Билетот, кој првпат беше воведен на 25 април, се наплаќа по стандардна цена од пет евра.
Градот објави дека продал вкупно повеќе од 195.000 билети, што е малку над очекувањата, пренесува Независне новине.
Влезот ќе се наплаќа во повеќето саботи и недели до средината на јули, кога градот ќе ја разгледа цената.
Како општо правило, целодневните посетители помеѓу 8:30 и 16:00 часот се обврзани да платат влезница и да добијат QR код, кој служи како доказ за плаќање. Ако не го сторат, може да платат казна од 300 евра.
Домашните жители, гостите кои преноќуваат, студентите и децата под 14 години се ослободени од плаќање.
Со околу 15 милиони посетители годишно, Венеција е една од најпосетуваните туристички дестинации во светот.
Масовниот туризам му носи многу приходи на градот, но и гужвите создаваат големи проблеми. Не е познато дали Венеција ќе ја задржи таксата по пробниот период.
Свет
Хамас планира да предаде 33 заложници, некои од нив се мртви
Хамас планира да ги предаде останките на неколку заложници кои се меѓу 33-те за кои се наведува дека ќе бидат ослободени во првата фаза од предложениот договор за прекин на огнот, пишува Њујорк Тајмс.
Во извештајот, во кој се цитирани две лица блиски до преговорите за договорот, се вели дека Хамас ги информирал посредниците дека веќе не се живи сите оние што требаше да бидат ослободени. Се очекуваше во првата фаза да бидат ослободени жени, деца, стари и болни лица, потсетуваат израелските медиуми.
Израел претходно инсистираше да се ослободат само живите заложници во таа фаза и се согласи со помалку од 40-те луѓе што првично ги бараше, со разбирање дека сите што требаше да бидат ослободени се живи. Хамас синоќа соопшти дека го прифатил договорот предложен од посредниците. Израел, пак, оцени дека договорот е многу поинаков од она на што се согласила земјата.
Официјални лица на Хамас рекоа дека првата фаза од договорот ќе вклучи 42-дневно примирје и ќе ослободи 33 израелски заложници во замена за голем број палестински безбедносни затвореници кои се чуваат во израелските затвори.
Кабинетот на израелскиот премиер Бенјамин Нетанјаху оцени дека понудата на Хамас не ги исполнува основните израелски барања, но најави дека ќе испрати преговарачи да продолжат со преговорите со американските, египетските и катарските посредници.
Се верува дека уште 128 заложници се држат во Газа, од околу 250 киднапирани во нападите на палестинските екстремисти предводени од Хамас на 7 октомври минатата година, но не се знае дека сите се живи. За време на еднонеделниот прекин на огнот на крајот на ноември минатата година беа ослободени сто и пет цивили, а пред тоа четворица.
Тројца живи заложници беа ослободени од војниците, а телата на 12 од нив беа пронајдени, вклучувајќи и тројца убиени по грешка од војниците.
Израелската војска ја потврди смртта на 35 заложници кои сè уште ги држи Хамас, повикувајќи се на нови разузнавачки информации од војниците кои дејствуваат во Газа.