Државната изборна комисија во четвртокот ја започна отворената седница со единствена точка на дневен ред разгледување и одлучување по поднесените барања на политичките партии ДУИ и СДСМ во врска со членот 49 – а од Изборниот законик.

Претседателит на ДИК, Никола Рилковски, на почетокот од своето излагање истакна дека и двете политички партии кои поднеле приговор до комисијата го испочитувале рокот од пет дена и ја искористиле можноста да достават вакви барања за да дадат свои забелешки за избирачкиот список во однос на доставување на барања за дополнување и бришење на податоци во избирачкиот список.

Расправата по однос на барањата на ДУИ и СДСМ ја започна заменик претседателот Субхи Јакупи кој побара доставените докази, во кои се наведува дека поголеми групи лица пријавени се со место на живеење на иста адреса, кои стигнале со барањата уште еднаш да се проверат во МВР за да се утврди дали навистина пријавените лица од избирачкиот список живеат на наведените адреси, по што за таа цел побара пауза на седницата од три часа.

Претседателот Рилковски повикувајќи се на деловничкото право ја одобри оваа тричасовна пауза по што настана жестока расправија меѓу членовите на комисијата.

Најостри во својата реакција беа членовите Сашо Срцев и Анета Стефановска, кои потенцираа дека Рилковски нема такво право и побараа најпрво сите да се произнесат па потоа да се одлучи дали всушност е потребен увид од страна на МВР.

Анета Стефановска истакна дека ваквата одлука на Рилковски е намерна и со цел да се закочи изборниот процес потенцирајќи притоа дека бил прекршен деловникот за работа бидејќи во него не била предвидена ваква деловничка пауза.

„Ако претседателот на комисијата дава ваква пауза на барање на еден член на комисијата, тогаш што ќе се случи доколку сите поединечно го направиме истото, мислам дека ова е обид за кочење на изборниот процес”, истакна Стефановска додавајќи дека претседателот на ДИК им го ускратил демократското право сите да се произнесат по однос на поднесените барања.

Според роковникот, пет дена по јавниот увид во списокот, ДИК истиот го доставува до политичките партии, а тие во рок од 5 дена имаат право да достават забелешки за изменувања, по што после 3 дена за забелешките се изнесува Државната изборна комисија.

Во изминатиот период ДУИ поднесе приговор со барање од избирачкиот список да се избришат 453 лица кои треба да гласаат во амбасадата во Тирана, а станува збор за лица кои имаат место на живеење на адреси и во општина Центар, и во Кичево и во Ресен.

СДСМ поднесе приговор во кој изрази сомнеж за веродостојноста на податоците на 22 илјади гласачи од 22 општини./крај/мф/ап