Со Камениот Мост и реката Вардар во кадар, новинарот Ана Корен вечерва го имаше своето прво вклучување во живо од Македонија, како дел од емисијата i-List, чие мајско издание е посветено на земјава.

Со Камениот Мост и реката Вардар во кадар, новинарот Ана Корен вечерва го имаше своето прво вклучување во живо од Македонија, како дел од емисијата i-List, чие мајско издание е посветено на земјава. Спорот со името со Грција беше во фокусот на снимениот разговор на новинарот Ник Робертсон со македонскиот премиер, Никола Груевски. Претседателот на Владата објасни дека со спорот, не е засегнато само името на државата, туку и идентитетот на македонскиот народ. Груевски пред гледачите на CNN ја истакна и посветеноста на земјата со учеството на армиските сили во мисијата ИСАФ во Авганистан. CNN, преку краток историјат, го опиша проблемот со името, информирајќи дека земјава во меѓународните организации е примена под референцата „Поранешна Југословенска Република Македонија“, а додека најголемиот дел од земјите во светот во билатералната комуникација и се обраќаат под името Република Македонија. Застаната покрај Вардар, новинарот Корен не пропушти да каже дека тоа е најголемата река во Македонија, која главниот град Скопје го дели на доминантно македонски и албански дел, додека Камениот мост е симболот што ги поврзува двете заедници. Преку неколку минутен прилог на новинарот Робертсон, беше опишана индустријата за вино во Македонија, споредувајќи ги лозовите полиња со долината Напа во САД. Во рамки на 30-минутното вклучување од Скопје, CNN информираше и за најновите случувања во светот. Корен на крајот потсети дека екипата на CNN до 14-ти мај секоја вечер ќе се вклучува во живо од Македонија, нарекувајќи ја фасцинантна земја со богата историја и култура. /крај/ач