Македонија
Помали партиципации за студентите од оваа година
Од оваа година на 63-те факултети на петте високообразовани институции во Скопје, Битола, Штип, Тетово и во Охрид ќе можат да се запишат повеќе бруцоши по пониски суми за партиципација.
Ова денеска на конференција за новинари го изјави министерот за образование Никола Тодоров. Според него оваа учебна година на факултетите има над 26 илјади слободни места, а највисоката партиципација ќе изнесува 400 евра.
Минатата академска година на универзитетите имаше 23.558 места за запишување на бруцоши, а оваа година квотите се зголемуваат и ќе има 26 илјади 881 слободно место.
„На вчерашната седница на Владата на Република Македонија беше донесена одлука за намалување на сумите за самофинансирањето. Во редовната квота сумата која што ќе треба да ја платат студентите ќе биде 200 евра годишно, а во квотата со самофинансирање највисоката сума ќе биде 400 евра, освен за оние факултети кои што доставија пониски цени за самофинансирање од тие што ги утврди Владата“, истакна на денешната прес-конференција министерот за образование и наука Никола Тодоров.
Тој додаде дека сумата за студирање на дисперзираните студии во редовна државна квота ќе изнесува 100 евра.
Тодоров посочи дека Министерството за образование и наука направило анализа за висината на партиципацијата која што ја плаќаат студентите во ЕУ и било констатирано дека во Македонија се плаќа една од највисоките партиципации во Европа и тоа било еден од клучните фактори за донесувањето на ваквата одлука на Владата.
Досега највисока партиципација за самофинансирање беше на медицинскиот факултет во износ од 1200 евра, а од оваа година со новата одлука на владата студентите кои ќе се запишат во квотата со самофинансирање ќе плаќаат по 400 евра годишно.
На Универзитетот „Св. Кирил и Методиј“ оваа академска година ќе се запишат 6336 во редовна, 3973 со кофинансирање, 1619 вонредни или вкупно има 11 928 слободни места.
На Универзитетот „Св. Климент Охридски“ во Битола во редовна квота има место за 2290 студенти, 1342 во квотата за кофинансирање, или вкупно 4275 слободни места.
На државниот универзитет во Тетово можност ќе имаат да се запишат 2890 студенти во редовна квота и 1095 со кофинансирање
На Универзитетот „Гоце Делчев во Штип во редовна квота има 4041 места, во квотата со самофинансирање 892 и 980 места за вонредни студенти.
Универзитетот за информатички науки и технологии „Св. Апостол Павле“ Охрид има место за 200 редовни студенти и 100 со кофинансирање./крај/бд
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Мисајловски: Треба да се пофали градоначалникот на Гази Баба Бобан Стефковски и неговиот тим бидејќи има многу проекти
Потпретседателот на ВМРО-ДПМНЕ и носител на листа во ИЕ 2, Владо Мисајловски, денес беше во посета на општина Гази Баба.
-Нови, позитивни работи во Гази Баба. Треба да се пофали градоначалникот Бобан Стефковски и неговиот тим бидејќи многу проекти има. Еве во последниве две години откако е тој градоначалник, можеме да бидеме сведоци на преку 30-тина игралишта, спортски и училишни сали. Многу реконструкции на патишта, водоводи, канализации. Вака навистина се сака Гази Баба и Македонија, рече тој.
Мисајловски потенцира дека е горд на тоа што ветувањата се реализираат.
-Сакам да ги повикам сите граѓани да ни ја дадат поддршката на 8-ми мај за ваквите проекти да продолжат. На 8-ми мај да ставиме печат на една голема историска победа, за да има повеќе средства за сите општини. 250 милиони евра годишно да се даваат на сите општини, вклучително и Гази Баба каде ќе можеме да видиме и други проекти, директно со помош од централната власт, истакна Мисајловски.
Тој потенцира дека промените се во рацете на народот.
-Примените се во твои раце, народе и Македонија останува твоја. Промените треба да ги започне секој еден од нас, порача тој.
Македонија
Гаши и коалицијата Вреди имаат посебна програма за иселениците и луѓето кои инвестираат во Македонија
Албанците кои живеат во различни земји во светот, ќе имаат придобивки од даночните олеснувања и поддршка за отворање бизниси во нивната татковина. Ова го предвидува планот на коалицијата ВЛЕН, кој Африм Гаши, претседател на „Алтернатива“ му го открил на претприемачот и активистот од Дебар, Ибрахим Колари, кој се вратил од Америка и инвестирал во својата татковина.
Во оваа прилика, Гаши покажа дека тој и коалицијата ВЛЕН имаат посебна програма за иселениците и луѓето кои инвестираат во Северна Македонија.
„Субвенционирање на таксите и даноците. За првите три години на сите оние кои живееле пет или повеќе години во странство и се враќаат да инвестираат износ од 50.000 евра или повеќе во отворање нов бизнис во Северна Македонија“, рече Гаши, покажувајќи и дека ќе има преполовување на данокот на добивка.
„Преполовувањето на данокот на добивка. Бизнисите отворени од иселениците ќе добијат поврат на даночниот процент врз основа на секторите во кои инвестираат (приоритетни ќе бидат новите технологии, преработката на храната и модерното земјоделство), но и врз основа на работните места што ги создаваат (приоритетни ќе бидат вработувањето на младите луѓе и жени)“.
Сепак, една од најинтересните точки што ги споменува Гаши е создавањето на Министерството за дијаспора, со кое ќе раководат кадрите од
дијаспората.
„Создавањето на структурата „Промотори на СМ“, преку која иселениците делуваат како економски амбасадори и привлекувачи на инвестиции. Посебни личности од јавниот живот и претприемачи од дијаспората ќе бидат назначени на позицијата Почесен конзул во соодветните земји, со цел да се влијае на подобрување на имиџот на земјата и сеопфатната комуникација на нашите иселеници со соодветните земји“.
Македонија
Мицкоски: Правилото победник со победник е прекршено, Владата ја формира мнозинството во парламентот
Жалам што сеуште раководството на ДУИ живее во некои времиња кој се минато во Македонија. Македонија е држава на сите граѓани во нејзе, ниту е федерација, ниту е би, три, четири национална држава. Македонија според Уставот е држава на сите граѓани, според демократијата оној кој има 61 пратеник ја формира идната влада во Македонија или ја формира владата, изјави претседателот на ВМРО-ДПМНЕ Христијан Мицкоски одговарајќи на новинарско прашање.
„Јас не знам како тие пресметале дека се претставници на мнозинското не македонско население во Македонија. Мислам дека сите ние сме граѓани на Македонија, Македонци и ценам дека политиката не треба да се гледа како условно кажано шведска маса, па ДУИ малце ќе земе сега од СДСМ, малку од ВМРО, малку од некоја друга политичка партија“, истакна Мицкоски.
Како што додаде, ДУИ беше шест и половина години со СДСМ во владата, а СДСМ се поразени во првиот круг претседателски избори и очекува да бидат поразени и после парламентарните избори.
„Очекувам ДУИ да биде опозиција за неколку недели од денес“, истакна Мицкоски.
Тој повторно нагласи дека демократијата се темели на принцип врз основа на тоа кој има мнозинството во парламентот ја прави Владата.
„Демократијата се темели на принципот кој има мнозинство во парламентот и ја прави владата, не знам за кој мајски договор зборува ДУИ, не знам за кое правило победник со победник. Имаше едно правило во минатото победник со победник кој е резултат од минатото, тој договор и тоа правило за жал самите тие го прекршија уште во 2017 година и повторно би потсетил дека политиката не треба да ја гледаме како шведска маса па малку со едните, другите, третите. Доколку ВМРО-ДПМНЕ освои мнозинство како што се очекува немаме ниту елементарна доверба да соработуваме со ДУИ, така што тие мора да одат во опозиција“, дециден е Мицкоски.