Новоизбраниот претседател на Македонија Ѓорге Иванов (49) во вторник на свечена седница во парламентот ќе биде инаугуриран за четврти шеф на државата

Новоизбраниот претседател на Македонија Ѓорге Иванов (49) во вторник на свечена седница во парламентот ќе биде инаугуриран за четврти шеф на државата од осамостојувањето во 1991 година.

Иванов пред зградата на Собранието треба да биде пречекан од претседателот во заминување Бранко Црвенковски и од Гардата на Армијата на Македонија.

Чинот на инаугурацијата ќе почне точно напладне со интонирање на македонската химна, по што новоизбраниот претседател ќе положи заклетва и ќе го одржи првиот говор во парламентот..

На инаугурацијата на претседателот Иванов ќе присуствуваат премиерот Никола Груевски со владиниот кабинет, претставници на МАНУ,. судството и на верските заедници, дипломатскиот кор, како и странски државници

Се очекува на свечениот чин на инаугирирање да присуствуваат претседателите на Албанија, Бамир Топи, на Србија, Борис Тадиќ, на Хрватска Стипе Месиќ и на Црна Гора Филип Вујановиќ.

Нејасно е дали на инаугурацијата ќе присуствува косовскиот претседател Фатмир Сејдиу, ,откако тој во неделата вечер изјави дека не добил покана, по информациите дека таква покана му била испратена од Скопје.

Некои медиуми, неофицијално, најавија дека дел од парламентарните партии на Албанците во Македонија ќе ја бојкотираат инаугурацијата на Иванов.

По свечената седница на инаугурацијата, шефот на државата во заминување и неговиот наследник, според традицијата, заедно ќе испијат претседателско кафе.

Иванов беше избран за шеф на државата на четвртите претседателски избори, со освоени околу 450,000 гласови.

Новиот претседател ќе има и нови работни простории во Вилата Анекс на Водно, во непосредна близина на резиденцијата во која престојуваа досегашните претседатели со своите семејства.

Ѓорге Иванов е роден 1960 година во Валандово каде завршил основно и средно образование. Во 1982 година дипломирал на Правниот факултет во Скопје. Во 1998 година докторирал на Правниот факултет во Скопје со одбрана на дисертацијата – Демократијата во поделените општества, со посебен осврт на Македонија.

Иванов е четвртиот претседател на Македонија од прогласување на независноста.

За прв претседател беше избран Киро Глигоров, кој функцијата ја извршуваше во два мандати од 1991 до 1999 година.

Меѓу двата мандати врз Глигоров беше извршен атентат во октомври 1995, што го преживеа со тешки повреди во пределот на главата.

Втор претседател на Македонија беше Борис Трајковски, кој функцијата ја извршуваше од крајот на 1999 до 26 февруари 2004 година, кога загина во авионска несреќа во Босна и Херцеговина.

Третиот претседател Бранко Црвенковски, чиј петгодишен мандат, истекува на 12 мај, се очекува да се врати на лидерското место во СДСМ, на редовниот партиски конгрес закажан за 24 мај./крај/ег/