Американскиот Сенат го поддржа давањето финансиска помош за новата украинска влада, и за воведување санкции против Русија, но побара до европските земји повеќе да се ангажираат во украинската криза, додека Европската унија дури во среда ќе ги објави само контурите за помош на Украина и го покани вршителот на должноста украински премиер Арсениј Јаценјук на вонредниот состанок на челниците на земјите членки што ќе се одржи во четврток во Брисел.

„Самостојни санкции на САД кон Русија нема да има толкав ефект доколку Европа останува рај за руските банки и руските олигарси кои таму ги инвестираат своите пари”, изјави демократскиот сенатор Крис Марфи, претседател на сенатскиот Комитет за Европа.

Челникот на сенатското мнозинство, демократот Хари Рајд, изјави дека е многу загрижен за ситуацијата во Украина, и позитивно го поддржа предлогот на претседателот Барак Обама кој побара економска помош за новата влада во Киев. Би бил среќен кога на Украина би и’ пружиле каква и да е помош, но би препорачал дека таа треба да биде усогласена со нашите сојузници”, истакна Рајд.

Сенаторите и од двете страни, демократите и републиканците, подготвуваа законска одредба со којашто за украинската економија би биле одобрени заеми од најмалку милијарда долари.

Сенатскиот Комитет за надворешни работи, покрај тоа, го разгледува и воведувањето санкции за одредени руски државјани, и нивни украински сојузници, кои би се состоеле од ускратување на визи за влез во САД до замрзнување на нивните имоти. „Руската Ахилова петица е нивната економија”, истакна републиканскиот сенатор Ед Ројс.

Покрај тоа САД поради руската инволвираност во украинската криза донесоа одлука за замрзнување на сите воени и економски проекти со Русија, што во вторникот го потврди и министерството за одбрана во Москва.

Министрите за надворешни работи на земјите членки на Европската унија, пак, кои дебатираа во понеделникот за ситуацијата во Украина, сепак не успеаја да донесат никакви рокови или детални казнени мерки против Русија. Тие само ја повикаа Москва итно да преземе мерки за намалување на тензиите во Украина, во спротивно челниците на ЕУ ќе донесат одлука за суспендирање на преговорите за визната либерализација и за новиот договор за соработка, како и насочени мерки против руски функционери.

„Комисијата на својот редовен состанок во среда ќе донесе план за помош на Украина”, изјави во вторникот портпаролката на Европската комисија, Пиа Ахренкилде- Хансен.

Украина, како што предупредува веќе извесно време новата власт во Киев, е на работ од банкротот, а според процените на новата влада, следните две години ќе и бидат неопходни 35 милијарди американски долари. Европската унија за потпишувањето на Спогодбата за придружување и слободна трговија и’ вети 610 милиони евра, што и сега отстранетиот претседател Виктор Јанукович го оцени како премалку. Меѓутоа, неофицијални дипломатски извори за агенциите соопштија дека европската помош не би надминувала повеќе од 1,5 милијарди евра.

Во четвртокот во Брисел ќе се состанат челниците на 28-те земји членки на вонредниот самит на ЕУ за Украина, на којашто е поканет да присуствува и привремениот украински премиер Арсениј Јаценјук. „Челниците ќе разговараат за развојот на ситуацијата во Украина и за начините како да се намалат тензиите”, изјави претседателот на Европскиот совет, Херман ван Ромпуј во вторникот./крај/мф/сн