Министерот за одбрана на Израел, Израел Кац изјави дека израелската армија го убила командантот на меѓународниот огранок на Иранската револуционерна гарда во напад на стан во Ком, Иран. Командантот Саид Изади го предводеше палестинскиот корпус на силите Кудс, рече Кац.

Силите Кудс изградија мрежа на арапски сојузници позната како Оската на отпорот, основајќи го Хезболах во Либан во 1982 година и ја поддржуваа палестинската милитантна исламистичка група Хамас во Појасот Газа. Но, мрежата поврзана со Иран претрпе голем удар во изминатите две години бидејќи израелските офанзиви по нападите на Хамас врз Израел на 7 октомври 2023 година ги ослабнаа и палестинската група и Хезболах.

Кац рече дека Изади го финансирал и вооружувал Хамас за време на првичните напади, опишувајќи го убиството на командантот како „големо достигнување за израелското разузнавање и воздухопловните сили“.

САД и Велика Британија го санкционираа Саид поради, како што велат, неговите врски со Хамас и палестинската милитантна група Исламски џихад, која исто така беше вклучена во нападите на 7 октомври.

Во текот на изминатата ноќ две лица загинаа, а четворица се повредени во напад на станбена зграда во иранскиот град Ком, според извештаите на иранските државни медиуми, пренесува Си-Ен-Ен.

Во нападот беше погоден четвртиот кат од зградата, а тоа се случи набрзо откако израелските одбранбени сили објавија дека почнале нов бран напади врз Иран.

Градот Ком се наоѓа во близина на тајниот ирански капацитет за збогатување ураниум Фордоу.

Неофицијално, Саид Изади, командант на палестинскиот корпус во иранските сили Кудс, наводно бил убиен во стан во градот Ком. Исто така, според неофицијални разузнавачки информации (RUMINT), генерал-мајор Абдул Рахим Мусави, новоименуваниот началник на Генералштабот на вооружените сили на Иран, наводно бил убиен во израелски воздушен напад во областа Саларије во Ком, како дел од операцијата наречена „Раскрет лав“.

#Breaking. According to rumor intelligence (RUMINT), the Major General Abdul Rahim Mousavi, the newly appointed Chief of Staff of the #Iran‘s Armed Forces, was successfully eliminated by the #Israel Air Force in Salariyeh neighborhood of #Qom. #OperationRisingLion https://t.co/5zUfzg69by pic.twitter.com/PsQ1UAgfsV

— Babak Taghvaee – The Crisis Watch (@BabakTaghvaee1) June 21, 2025

Си-Ен-Ен го лоцираше видеото што покажува оштетување на зграда во југозападен Ком. На видеото се гледа како гори пожар на горните катови на повеќекатница.

Во исто време, полуофицијалниот Nour News објави дека противвоздушните системи се активирани над главниот град Техеран, 130 километри северно од Ком.

Стотици американски граѓани го напуштија Иран по копно во текот на изминатата недела откако изби војната со Израел, пишува „Ројтерс“ повикувајќи се на извештај на Стејт департментот до кој имал увид.

Додека многумина заминале без проблем, бројни граѓани се соочиле со задоцнување и малтретирање при обидот да си заминат, се наведува. Неидентификувано семејство пријавило приведување на двајца американски државјани кои се обидувале да го напуштат Иран.

Интерната порака од 20 јуни го нагласува предизвикот со кој се соочува Вашингтон во обидот да ги заштити и да им помогне своите граѓани во земја со која нема дипломатски односи и во војна во која САД наскоро би можеле да се вклучат.

Стејт департментот не одговори веднаш на барањето за коментар.

Претседателот Доналд Трамп и Белата куќа во четвртокот соопштија дека во следните две недели ќе одлучат дали САД ќе се вклучат во израелско-иранската војна. Трамп го држеше светот во неизвесност за неговите планови, преминувајќи од предлагање брзо дипломатско решение до сугерирање дека Вашингтон може да се приклучи на борбата на страната на Израел.

Воздушната војна започна на 13 јуни кога Израел го нападна Иран.  Израел е единствената земја на Блискиот Исток за која се верува дека има нуклеарно оружје и тврди дека со нападот на Иран го спречил Техеран да развие сопствено нуклеарно оружје. Иран, кој тврди дека неговата нуклеарна програма е мирна, возврати со свои напади врз Израел.

Американскиот Стејт департмент издаде предупредување за патување во петокот во кое ги повикува своите граѓани кои сакаат да го напуштат Иран да користат копнени рути преку Азербејџан, Ерменија или Турција. Иранскиот воздушен простор е затворен.

Амбасадата на САД во главниот град на Туркменистан, Ашгабат, побарала влез за повеќе од 100 американски државјани, но владата на Туркменистан сè уште не одобрил, се вели во телеграмата.

Исламската Република ги третира иранско-американските двојни државјани исклучиво како граѓани на Иран, нагласи Стејт департментот.

„Американските граѓани се изложени на значителен ризик од испрашување, апсење и притворање во Иран“, се вели во предупредувањето.

Вашингтон бара начини како потенцијално да ги евакуира своите граѓани од Израел, но речиси и да нема начин да им помогне на Американците во Иран. Двете земји немаат дипломатски односи од Иранската револуција во 1979 година.