Свет
Виното отишло, милионите не дошле
Во “Повардарие” од Неготино стигаат првите кривични пријави за тоа што не стигнале милиони евра од продадено вино. Поранешниот директор на винарската визба, Драган Рангелов, доби пријава од полицијата за злоупотреба на функцијата.
“ПОВАРДАРИЕ” ВРИЕ
Во “Повардарие” од Неготино стигаат првите кривични пријави за тоа што не стигнале милиони евра од продадено вино. Поранешниот директор на винарската визба, Драган Рангелов, доби пријава од полицијата за злоупотреба на функцијата. Тој се товари дека во август 2001 година овозможил да се направи договор за цесија, со кој побарувањето од бугарската фирма “Сухин Дол” од над 150.000 евра, му го преотстапил на Бугаринот Живомир Василев. Парите никогаш не дошле во “Повардарие”.
Но во фирмата велат дека е многу поважно да се најде главниот виновник за зделката со Белорусија вредна еден милион евра. Парите за продаденото вино “Смедеревка” никогаш не биле наплатени од белоруската фирма “БСТ”. За овој случај бил ангажиран и Интерпол.
Полицијата, која цело лето ја чешлаше документацијата на неготинската визба најавува уште пријави. Обвинетиот Рангелов тврди дека не го извршил кривичното дело за кое се товари.
– Се работи за одмазда од еден од поранешните директори. Јавно прашувам што е со кривичната пријава против него, која пет години стои во судските фиоки – ни изјави тој.
Бугарската фирма “Сухин Дол” купувала вино и кога пропаднала во “Повардарие” било одлучено да се проба да се извлечат заробените пари со помош на Бугаринот Василев.
Во “Повардарие” сметаат дека постојат повеќе виновници за пропаѓањето на визбата и за огромните долгови од околу 11 милиони евра, кои ги наследија новите газди. Тие долгови се сега намалени за околу 3,5 милиони.
Неофицијално, неготинските земјоделци во потрага по пласман за своето вино дошле до непотврдени сознанија дека парите од Белорусија дошле во Македонија, односно дека со нив било набавено оружје.
– Тогаш беше страшна винска криза. Белорусија ни беше шанса нашата “Смедеревка” да отиде таму како база за шампањско. Цели композиции заминаа за белорускиот пазар. Пропадна фирмата, ни пропадна зделката – објаснуваат во “Повардарие”.
Еден од поранешните директори, пак, потпишал договор со кој визбата станала гарант за кредит од околу 400.000 евра, земен од “Радобанка” на име на демиркаписка фирма, блиска до поранешната локална власт во Демир Капија. Бидејќи кредитот не бил вратен сега банката во стечај ги барала тие средства од “Повардарие”, а пресметувала и камати. Како сопственик на фирмата се споменува бившиот градоначалник на Демир Капија, Трајче Димитриев, сопственик на фирмата “Корал”. Тој вчера не сакаше да коментира за договорот.
Од визбата јавно прашуваат зошто во изминатиот период до доаѓањето на новите газди инспекторите на МВР и даночниците немале пристап до документацијата на визбата и зошто 3-4 години никој не се сетил да го побара неплатениот данок на додадена вредност кој достигнал сума од околу 1,5 милион евра.
Излегувањето на површина на злоупотребите во неготинската визба ја разбрануваа јавноста во Тиквеш. Недомаќинското работење во минатото и досега беше споменувано како причина за се уште неисплатеното ланско грозје.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Премиерката на Естонија: Немаме план Б ако Украина ја загуби војната
Естонската премиерка Каја Калас изјави дека Естонија нема план Б доколку Украина ја загуби војната.
„Не треба да се предаваме на песимизмот. Победата во Украина не е само територија. Ако Украина влезе во НАТО, дури и без одредена територија, тогаш тоа е победа бидејќи ќе биде ставена под чадорот на НАТО“, рече Калас во интервју за Би-Би-Си.
Владата на Естонија одвои повеќе од еден процент од естонскиот БДП за воена и финансиска помош за Украина.
„Ако секоја земја на НАТО го направи тоа, Украина ќе победи“, посочува Калас.
Естонија, мала балтичка држава која некогаш беше дел од Советскиот Сојуз, е уверена дека откако ќе завршат борбите во Украина, рускиот претседател Владимир Путин ќе го сврти своето внимание кон Балтикот, барајќи да ги врати земјите како Естонија под контрола на Москва.
Свет
(Видео) Поплави во јужна Германија, жителите евакуирани со хеликоптери
Невреме вчера и денеска погоди големи делови од јужна Германија, предизвикувајќи прекин на сообраќајот, а некои жители мораа да бидат евакуирани со хеликоптер.
Во областа на баварскиот град Аугсбург, жителите мораа да бидат евакуирани поради дефект на насип и брана, соопштија властите.
Поради поплавите, во прекин е железничкиот сообраќај меѓу главниот град на Баварија, Минхен, Брегенц во Австрија и Цирих во Швајцарија.
Во прекин беше и линијата меѓу Улм и Аугсбург, а меѓуградските возови на релација Штутгарт-Минхен беа пренасочени.
Жителите на баварскиот град Фишах, западно од Минхен, биле изнесени со хеликоптер од своите домови откако се излеа реката Шмутер.
Update zum Wehr#Hochwasser pic.twitter.com/lX5hrZp46M
— Bummibaer 🐻 🇺🇦 (@MrBummiBinBaer) June 1, 2024
Водостојот расте, дождот не престанува да паѓа. Прогласена вонредна состојба
Мештаните поинаку не можеа да ги напуштат своите домови, изјави портпаролката на окружните власти. Според полицијата, службите за итни случаи и чамците ќе ги преземат луѓето во поплавените домови. Неколку соседни окрузи прогласија вонредна состојба бидејќи дождот продолжува да паѓа и нивото на водата расте.
Во сојузната покраина Баден Виртемберг, западно од Баварија, ситуацијата брзо се влоши откако реката Ротум почна да се излева на неколку места.
Во малиот град Рајнштетен, 150 служби за итни случаи работат повеќе од 22 часа за да ја ублажат поплавата што се случи по пукањето на браната, изјави градоначалникот Филип Буеркл за ДПА.
Буеркл рече дека противпожарните служби од блиската област пумпаат вода од подрумот и дистрибуираат вреќи со песок. Досега е евакуиран само еден дом за стари и изнемоштени лица во кој престојувале 15 лица.
Училиште во селото Мекенбеурен, во близина на езерото Констанца, мораше да биде евакуирано откако локалната река проби вреќи со песок поставени околу него.
Германската метеоролошка служба предвиде дополнителни грмежи и до 80 литри дожд на метар квадратен во јужните делови на Германија. Невремето се очекува да продолжи и утре.
Свет
Пукање во западна Германија, ранети четири лица, напаѓачот е во бегство
Четири лица се ранети денеска во престрелка во Хаген, во западна Германија, а осомничениот сторител е во бегство, соопшти полицијата. Во потрагата бил вклучен и полициски хеликоптер.
Властите претходно потврдија за ДПА дека двете места на злосторството вклучуваат фризерски салон и блиска станбена зграда во Хаген, јужно од Дортмунд.
Полицијата е на местото на злосторството, а на граѓаните им се препорачува да го избегнуваат просторот околу местото на злосторството.