Александар Николоски, потпретседателот на ВМРО-ДПМНЕ, денес, се обрати од населеното место Тремник и истакна дека проектот за изградба и реконструкција нови улици во населеното место Тремник е дел од серија на проекти, со вкупна вредност од околу 16 и пол милиони евра, обезбедени преку соработка со Светска банка. Според него, Тремник ќе добие современа локална инфраструктура.

,,Секогаш е задоволство кога се почнуваат нови проекти. Ова е една серија на проекти за изградба и реконструкција на локални улици, која што ја правиме насекаде низ државата. Вкупно во соработка со Светската банка, алоциравме некаде над 14 милиони евра за локални улици коишто одеа во три повици, а во моментот имаме четвртиот и активен повик од дополнителни 2 и пол милиони евра, што значи дека вкупно некаде околу 16 и пол милиони евра инвестираме во локални улици и во реконструкција и во изградба“ кажа Николоски.

Николоски истакна дека проектот за изградба на нови улици во село Тремник успешно ќе се реализира и жителите на Тремник ќе добијат современи улици.

,,Овој повик заврши успешно и ми е драго што жителите на село Тремник, не само што ќе добијат нови улици, туку тоа ќе биде од врвни изведувачи и од врвен надзор. Тука изведувач е градежната компанија ,,Гранит“, а надзор е светски познатата компанија ,,Ептиса“. Заедно со Светска банка, овие три елементи, даваат една сигурност дека проектот ќе биде успешно завршен. Сакам да се заблагодарам на Марија, која што како секретар на Општина Неготино работеше на овој проект, го аплицираше во Министерството за транспорт, Министерството за транспорт во Светска банка и успеавме да ги добиеме средствата. А, сега како градоначалник, ќе има чест и да ја пресече овде лентата некаде за месец, до месец и половина, кога ќе се зaврши овој пат“, рече Николоски.

Според Николоски, ова е проект кој општината сама не би можела да го реализира, а додаде и дека ќе продолжи поддршката за општина Неготино и очекува уште поинтензивна работа по завршувањето на локалните избори.

,,Ќе продолжиме на овој начин да ги поддржуваме и останатите општини, а секако и општина Неготино. Само да кажам дека се работи за улици во должина од вкупно 930 метри, само во населеното место Тремник, и вкупната сума која што ќе се потроши е некаде околу 9 милиони денари. Средства кои што општината сама не би можела да си ги дозволи“, истакна Николоски и додаде:

,,Ќе продолжиме да ја поддржуваме општина Неготино и се надевам дека по завршувањето локалните избори и изборот за Марија на градоначалник, уште по интензивно ќе работиме на овие проекти“.

Куманово прераснува во регионален економски центар благодарение на големиот број странски и домашни инвестиции кои или се во тек или наскоро ќе започнат да се градат во најголемата општина во Македонија. Кандидатот за трет градоначалнички мандат во Куманово и претседател на Движењето ЗНАМ – За наша Македонија, Максим Димитриевски вели дека општината ги има сите предиспозиции да биде „мотор на економската локомотива“ не само на земјата, туку и на целиот регион.

„Светскиот гигант Лидл веќе инвестираше околу 110 милиони евра, и досега отвори над 150 нови работни позиции. Тоа се над 150 причини младите да не емигрират, туку да се обидат својата животна перспектива да ја реализираат во своето родно место. Младите се иднината на Куманово и токму тие се главната причина заради која сите заедно мора да работиме на економски развој и напредок. Општина Куманово ќе ги вложи сите свои капацитети да обезбеди што е можно повеќе нови инвестиции, но ќе продолжи да ги поддржува младите и преку образованието, културата, спортот“, рече Димитриевски.

Тој потенцираше дека на територијата на општина Куманово работат повеќе големи странски компании како Армос Плус, Дрекселмаер, како и голем број домашни бизниси.

„Отвораме нови можности за вработување, нови можности за развој и просперитет на нашиот град и регионот. Да продолжиме да го развиваме Куманово во место на домашни и странски инвестиции, отворање нови индустриски зони, нови вработувања за младите, нови перспективи. Да го подигнеме БДП, и во Куманово, и во регионот, и во државата“, истакна Димитриевски.

Актуелниот градоначалник на Куманово, кој е во трка за нов мандат, најави дека во идниот четиригодишен мандат заедно со неговиот тим ќе работи на остварување на целта за економски развиено Куманово. Еден од приоритетите во програмата на Движењето ЗНАМ е Куманово да биде општина со најголем економски раст во државата, најголем број новоотворени работни места и најсветла перспектива за младите.

Министерот за здравство Азир Алиу лично смета дека треба да се додаде законска обврска за токсиколошки анализи на сите лекари по скандалозната снимка од директорот на Клиниката за неврологија Игор Кузмановски на која тој меша бела прашката материја и кажува дека зема исклучиво со „чисто бело“. Алиу не е сигурен дали во овој момент ваква законска обврска може да се вметне во некој од 12 здравствени закони кои се менуваат во овој момент.

„Правно не знам дали тоа може да се дефинира. Јас би сакал, како министер за здравство, да има таков член во законот, но да ви кажам во кој закон и дали тоа може да се формулира не би сакал кога не сум сигурен. Јас лично би сакал да имаме уште една институција која што ќе го проверува и тој момент, покрај стручноста“, рече министерот Алиу.

Сега веќе разрешениот директор на Клиниката за неврологија Кузмановски, од март годинава работел со истечена лиценца. Министерот Алиу најави дека неколку комисии, покрај Лекарската комора и Државниот санитарен и здравствен инспекторат работат  на утврдување на тоа дали и какви прегледи правел Кузмановски во периодот додека бил без лиценца.

Иако не е сигурен дали токсиколошките анализи може да станат законска обврска, министерот Алиу најави дека ќе побара во „Мој термин“ да се вметне рокот на лиценцата на лекарите и системот да им забранува логирање во моментот кога ќе им истече важноста на лиценцата.

Алиу извести дека на местото на разрешениот Кузмановски, за вршител на должност го назначил Јован Божиновски, специјалист невролог и асистент на Медицинскиот факултет во Скопје. Тој, пак, рече дека на негова иницијатива на Клиниката ќе се формираат две интерни комисии со кои ќе се иницира внатрешен стручен надзор на работата на разрешениот директор во последните 12 месеци.