По острите реакции во јавноста, СДСМ сега се двоуми дали да го игнорира ветото на шефот на државата

По острите реакции во јавноста, СДСМ сега се двоуми дали да го игнорира ветото на шефот на државата

Социјалдемократите се пишманат за поддршката за измените на Кривичниот законик, со кои се овозможи една значително поблага формулација за злоупотребата на службената должност. По острите реакции во јавноста, владејачката партија сега се двоуми дали да го игнорира ветото на шефот на државата, Бранко Црвенковски, и повторно да ги изгласа споменатите законски корекции или да оди на варијантата Владата да предложи нов закон. Овој законски текст би се однесувал само на зголемување на санкциите за изборните нерегуларности и би бил ставен на нова собраниска седница. Ваквата опција станува с` поизвесна откако парламентот, под разни изговори, неколку дена го одлага репризното издание на измените на Кривичниот законик.

Вчера, откако спикерот Љупчо Јордановски по неколку неуспешни обиди едвај обезбеди кворум за работа, СДСМ издејствува промена на дневниот ред, па корекциите на Кривичниот законик неочекувано се поместија за последна точка. Лути поради ваквиот потег, пратениците од ВМРО-Народна побараа пауза, но попладнето, иако беа во парламентот, не влегоа во собраниската сала, по што Јордановски ја одложи седницата за денеска. Пратеникот од ВМРО-Народна Жарко Караџоски, кој го поднесе контроверзниот амандман, кој стана составен дел на Кривичниот законик, само кусо прокоментира дека се изненадени од промената на однесувањето на СДСМ. Ниту тој ниту кој било пратеник од ВМРО-Народна не сакаше да каже дали денеска ќе влезат во собраниската сала.

Координаторот на пратеничката група на СДСМ, Јани Макрадули, вчера ги избегнуваше медиумите, одбивајќи да даде каков било коментар, велејќи дека е презафатен со други обврски. Од новинарите бегаа и парламентарците од ЛДП, кои првиот пат, исто така, го гласаа законот, а вчера само ги креваа рамениците.

Во ВМРО-ДПМНЕ, пак, ликуваа поради новонастанатата ситуација, но не ја исклучуваа можноста од „дополнителни пазарења меѓу ВМРО-Народна и СДСМ“. Особено поради тоа што пред овој парламент како обврска стои и законот за следење на комуникациите, со кој ќе се легализира прислушувањето. Станува збор за двотретински закон, а обезбедувањето 80 гласа без пратениците на ВМРО-Народна практично е невозможно.

Собранието ги донесе измените на Кривичниот законик на 5 мај, но Црвенковски не го потпиша указот откако претходно се консултирал со домашни и странски експерти, но и со меѓународните претставници во нашата земја. Дипломатите биле фрапирани од упорноста по секоја цена да се амнестираат политичарите кои ја злоупотребиле службената положба.

Црвенковски тогаш образложи дека спорната измена на Кривичниот законик фрла сомневање во искрените намери на Владата за лимитирање на дискреционите права на функционерите и борбата против корупцијата. Наспроти ставот на претседателот, премиерот Владо Бучковски тврдеше дека не се прави чекор назад во борбата против корупцијата, туку само се прави преформулација на казнената одредба што ќе им помогнела на судските и на истражните органи да бидат поефикасни.

Последни со апел до пратениците се огласија и од Државната комисија за спречување на корупцијата, која оцени дека „амандманот за членот 353 став 1 од Законикот претставува сериозен упад во системот на кодифицираното кривично-правно законодавство и дерогирање на можностите за ефикасна борба против корупцијата“. Според антикорупционерите, со предложените измени се создаваат услови за неприкосновеност во извршувањето на службената должност.