Над 2.200 кривични дела од областа недозволена трговија со дрога откриени се во изминатите четири и пол години, при што за ова кривично се пријавени 2.565 лица.

Над 2.200  кривични дела од областа недозволена трговија со дрога откриени се во изминатите четири и пол години, при што за ова кривично се пријавени 2.565 лица. Во овој период запленети се околу два тони и шестотини и шеесет килограми разни видови наркотични дроги, 1,6 тони марихуана, 493,8 килограми кокаин, 376 килограми хероин, околу 26 килограми опиум и друго со севкупна вредност на нарко пазарот од над 100 милиони евра.

Ова го истакна министерката за внатрешни работи Гордана Јанкуловска, на отворањето на Втората Меѓународна конференција тематски посветена на “Националните стратегии за борба против трговијата со дрога-намалување на снабдувањето со дрога“, што се одржува во Охрид, јавува Охридњуз.

На конференцијата што ја организираат Министерството за внатрешни работи и Женевскиот центар за демократска контрола на вооружените сили (ДЦАФ), учествуваат полициски функционери и експерти на министерствата за внатрешни работи од повеќе земји од регионот и пошироко, како и претставници на повеќе меѓународни организации (Интерпол, СЕКИ, ДЦАФ, и други).

Според министерката Јанкулоска има потреба од вакви средби на кои научно се расправа за проблемот со нелегална трговија со дрога, затоа што како што рече, не е доволно само полициите да се активни, туку е неопходно да се вклучат и експертите од науката кои ќе дадат насоки како да се води таа битка и да се откријат новите форми и методи на дејствување на криминалните групи.

„Сведоци сме дека во последно време откриваме кривични дела кои во минатото биле целосно непознати и во делот на злоупотребата и во делот на недозволената трговија со дрога и неопходно е да се следат трендовите кои за жал ги диктираат криминалците, а институциите треба да бидат чекор пред нив за да можат да им се спротивстават“ истакна Јанкуловска.

Во рамки на дводневната Конференцијата, експертите во повеќе пленарни работни сесии ќе разменат искуства во врска за националните програми и заеднички активности во спречувањето на нелегалната трговија со дрога.

Заклучоците од конференцијата ќе бидат објавени во алманах кој ќе биде од корист на институциите кои се занимаваат со борба против недозволената трговија со дрога, најави директорот на Бирото за јавна безбедност, Љупчо Тодороски.

Тој истакна дека Македонија има капацитет да организира редовно вакви конференции во Охрид на кои научни експерти ќе ги изнесуваат најновите сознанија и методи, со цел создавање нова стратегија и методи за борба против трговијата со дрога /крај/охридњуз/фф