Македонија
Казна за службениците што на Маневски му даваа и плата и пензија
Откако во јавноста излезе случајот за министерот за правда, Михајло Маневски дека неколку месеци земал плата и пензија, Владата, денеска илезе со соопштение дека поради грешки на одговорни стручни служби кај 148 лица се случило тоа
Раководните лица на институциите каде настанале пропустите ќе бидат казнети согласно позитивните законски процеси, соопштуваат од Владата.
“Раководните органи на засегнатите институции каде што настанале пропустите од административна природа, по спроведена интерна постапка согласно законите и подзаконските акти, во пропишана процедура, утврдија постоење на одговорност кај одговорни службеници, кои ќе бидат санкционирани согласно позитивните законски прописи“, стои во соопштението од Владата..Од Владата објаснуваат дека до вакви пропусти дошло поради грешки на одговорни стручни служби при утврдување на право на плата или пензија во Фондот за пензиско и инвалидско осигурување, но пропусти на одговорните служби биле направени и во други институции.“Извршено неправилно утврдување на фактичката состојба во врска со утврдувањето на правото на плата или правото на пензија за 148 (сто четириесет и осум) лица“, стои во соопштението од Владата..Меѓу тие лица има граѓани со различни професии, адвокати, нотари, лица носители на јавни функции и овластувања, како и граѓани кои не се вклучени во јавниот општетствено-политички живот. “Се работи за акти на непостапување, или ненавремено постапување на одговорните стручни служби во врска со примената на законите. Тие акти доведуваат до двојна примена на правото, или пак грешна примена на правото, кое ја регулира конкретната материја и проблематика“, објаснуваат од Влада.Како надлежна за функционирањето на институциите каде се случиле пропустите Владата апелира во иднина во иднина да посветат посебно внимание и да преземат соодветни мерки и активности за превенирање на вакви или слични случаи, а евентуалните сторители на нови пропусти да бидат најстрого санкционирани.Пред еден месец пратеникот Владо Бучковски од СДСМ, го постави прашањето на премиерот Груевски, на седница во Собранието за пратенички прашања, зошто министерот Маневски зема и плата и пензија. Потоа следуваа уште неколку политичари, за кои постоеше сомнение дека исто така земаат и плата и пензија. Владата во соопштението бара да не се злоупотребуваат ваквите грешки на администарцијата за дневно-политички цели. Останува прашањето, ако не беше спомнат политичар од висок ранг, како министер за правда и тоа во законодавниот дом, дали Владата ќе го решеше проблемот, или тие 148 лица ќе земаа плата и пензија и понатаму.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Вицегувернерката Нацевска: Продолжуваат активностите на Народната банка за развивање на домашниот финансиски пазар
„Ефикасното спроведување на монетарната политика, покрај од мерките на Народната банка, во голем дел зависи и од функционалноста и натамошниот развој на домашните финансиски пазари, меѓу кои девизниот пазар има клучна улога. Оттаму, Народната банка продолжува со активностите за натамошно унапредување и развивање на домашниот девизен пазар и во таа смисла, искажуваме поддршка за иницијативите и активниот придонес на домашните банки. Во тој процес, нашата институција ја одржува активната соработка со сите релевантни банкарски здруженија, со деловните банки и со сите останати чинители, заради натамошно унапредување и развивање на домашниот финансиски пазар“, порача вицегувернерката Емилија Нацевска во обраќањето на 29-тото годишно собрание на Здружението на финансиски пазари – АЦИ коешто се одржа во Струга.
Во обраќањето, Нацевска нагласи дека Народната банка постојано работи на унапредување на ценовната транспарентност и натамошно продлабочување на домашниот девизен пазар.
„За задржување на професионализмот и за усогласување со најдобрите меѓународни практики, се разгледуваат можностите за прифаќање на глобалниот кодекс за девизниот пазар (FX Global Code), како во Народната банка, така и од страна на банките. Оттаму се и очекувањата дека АЦИ Македонија и Министерството за финансии ќе продолжат со активната соработка за примена на договорот ИСДА на домашните пазари, како можност за подобро интегрирање и достапност на деловните банки до странските финансиски пазари, во склоп на проектот финансиран од ЕБОР за приспособување на домашната правна рамка за деривати и репо-договори со меѓународната практика“, порача Нацевска.
Поволните движења на девизниот пазар коишто беа забележани минатата година се резултат на нормализирањето на побарувачката на девизи од енергетскиот и од останатите водечки корпоративни сектори, а значителен придонес има и натамошното зголемување на понудата на девизи од физичките лица, што е силен сигнал за довербата во домашната валута. „Ваквите позитивни движења на девизниот пазар изминатата година придонесоа за релативно обемни интервенции на Народната банка за откуп на вишокот девизни средства од банкарскиот систем, коишто беа близу до рекордните нивоа пред пандемијата“, кажа Нацевска. Поволните трендови на домашниот девизен пазар и на почетокот на тековната година влијаат поволно врз нивото на девизните резерви. Со тоа, според сите релевантни меѓународни одредници, показателите за адекватноста на девизните резерви се постојано во сигурната зона, гарантирајќи ја стабилноста на курсот на домашната валута.
Македонија
Одземена дрога испратена во мала пратка и огнено оружје од скопјанец
Одземени 30 грама дрога и пиштол од скопјанец, по заедничка акција на инспектори од Одделението за истраги при Царинската управа и крим полицијата при МВР.
Дрогата е откриена при претрес на лицето извршен откако истото подигнало пратка во Пошта пристигната од Германија. Во координација со дежурен јавен обвинител, инспектори од Секторот за контрола и истраги заедно со припадници од МВР извршија и претрес во домот на лицето каде е пронајден пиштол кој е одземен од страна на царинските инспектори, соопшти Царинската управа.
Против лицето ќе биде поведена кривична пријава до Основното јавно обвинителство.
Царинската управа согласно приоритетите во континуитет спроведува акции за сузбивање на сите форми на криминал, грижејќи за безбедноста на своите граѓани, додаваат во соопштението.
Скопје
Санкционирани 191 непрописно паркирано возило на територија на општина Центар
ЈП Паркинзи на Општина Центар и Општина Центар во соработка со Сообраќајната полиција-Скопје санкционираа 191 непрописно паркирано возило кои го попречувале нормалното и безбедно одвивање на сообраќајот.
„Во периодот од 13.05. до 19.05.2024 година, со помош на специјалните возила „Пајак“ на ЈП ПОЦ отстранети се 102 непрописно паркирани возила, а со поставување на механичко средство „Блокатор“ санкционирани се 89 возила кои биле затекнати на резидентни паркиралишта, а не биле корисници-резиденти на секторот во којшто биле паркирани“, велат од ПОЦ.
За трајно решение на сообраќајниот метеж и проблемот со неправилното паркирање неопходна е поголема сообраќајна култура, затоа ЈП ПОЦ и СВР Скопје во наредниот период ќе продолжат со секојдневно отстранување на сите непрописно и несовесно паркирани автомобили во општина Центар со цел да се подигне сообраќајната свест на повисоко ниво и да се зголеми безбедноста во сообраќајот, се додава во соопштението на ПОЦ.