Македонија
Вељановски во сабота ќе ги распише претседателските избори
Вељановски најави дека во сабота ќе ги распише петтите по ред претседателски избори кои ќе треба да се одржат во периодот од 12 март до 12 мај.
„Уставна надлежност и обврска на претседателот на Собранието е да ги распише изборите. Во конкретниот случај имаме редовни претседателски избори кои треба да се одржат во периодот од 12 март до 12 мај и јас во сабота на 1 февруари ќе ги распишам и ќе го одредам датумот на одржување на претседателските избори“, рече Вељановски во интервју за МИА.
Собранието, според него, во моментов нормално работи, а доколку има само претседателски избори, Собранието нема да одржува седници нешто повеќе од еден месец пред првиот круг.
„Во периодот пред претседателските избори не држиме пленарни седници за да не се претвори салата во место за кампања“, истакнува Вељановски.
Тој во интервјуто изразил задоволство од донесувањето на измените и дополнувањата на Изборниот законик, кои беа усогласени и од власта и од опозицијата, но исто така и очекување учесниците да ги применат на изборите.
Кандидатите за претседател сé уште се непознати за јавноста, иако меѓу граѓаните и политичките партии наголемо за зборува за претстојните претседателски избори кои треба да се одржат годинава.
Политичките партии тактизираат и не ги откриваат своите кандидати, сите чекаат другиот да го направи првиот чекор.
Услов за кандидат за претседател исполнува секое лице кое до денот на изборите наполнило најмалку 40 години и истото живеело во Македонија десет во последниве 15 години.
Кандидатите за претседател за да го добијат мандатот треба да ја добијат довербата од мнозинството гласачи од вкупниот број избирачи.
Со измените на уставот во 2009 година кои пратениците ги изгласаа со 86 глаза „за“ и ниту еден „против“ беше намален цензусот за избор на шеф на државата кој претходно изнесуваше 50 проценти излезеност на гласачкото тело. Со овие измени се предвидува во вториот круг да биде избран претседател доколку кандидатот го освои мнозинството гласови при излезеност на избирачите од 40 отсто.
Доколку повторно се разгледува можноста за евентуално олеснување на процедурата за избор на претседател и намалување на потребниот цензус, тогаш пратениците ќе треба да постигнат политички консензус и во парламентот да обезбедат двотретинско мнозинство.
На последните претседателски избори претседател Ѓорге Иванов го доби мандатот со околу 454 илјади гласа или доверба која изнесуваше 42,6 проценти. Актуелниот претседател сé уште не се изјаснил дали ќе се бори за доверба за уште еден мандат.
Владата од Буџетот за 2014 година за избори обезбеди близу пет милиони евра, пари од државната каса со кои треба да се создадат високи стандарди за успешно спроведување на изборите на претседател.
Кампањата за претседател ќе трае дваесет дена пред изборите со тоа што последниот ден е ден на предизборен молк./крај/мф/ап
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Делови од Аеродром и Шуто Оризари денеска без струја
Од ЕВН Македонија АД известуваат дека денеска без електрична енергија ке останат:
· од 09.00 до 11.00 часот корисниците, од булевар Јане Сандански бр. 30. (Општина Аеродром)
· од 09.00 до 11.00 часот дел од корисниците на ул. Индира Ганди. (Општина Шуто Оризари)
Македонија
Намалена видливост поради магла на Плетвар, Ѓавато и Пресека
Сообраќајот на државните патишта се одвива во зимски услови, по влажни коловози, на некои повисоки места со остатоци од кашест снег на коловозот по интервенција на дежурните екипи на ЈП МакедонијаПат.
Намалена видливост до 100 метри поради магла има на планинскиот превој Плетвар, Ѓавато и Пресека, извести АМСМ.
Од 05:25 часот на патниот правец P1105 Удово-Валандово има излевање на Калковска Река на коловозот, се воведува забрана за сообракајот на тој патен правец и се пренасочува на патниот правец Р1401 село Марвинци-Валандово.
Интензитетот на сообраќај на патните правци надвор од градските средини е умерен. На граничните премини од македонска страна, нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Променливо облачно со повремен слаб дожд и ветер
Времето денеска ќе биде облачно со слаб ветер од променлив правец. Минималната температура ќе биде во интервал од -4 до 2, а максималната ќе достигне од 2 до 9 степени.
Во Скопје, променливо облачно со повремен слаб дожд. Минималната температура ќе се спушти до 2, а максималната ќе достигне до 7 степени.
Времето во наредните денови
Денеска наместа ќе има услови за слаби врнежи од дожд и снег. Потоа во следните два дена времето ќе биде променливо облачно со сончеви периоди. Нови врнежи од дожд, а на планините снег се очекуваат од четврток.

