Македонија
Трибина за предлогот на Иванов за утврдување на настаните во Собранието
Во организација на Институтот „Павел Шатев“ во среда во Конгресната сала на Спортскиот центар „Борис Трајковски“ ќе се одржи трибина на која ќе се дебатира за предлогот на Претседателот Ѓорге Иванов за формирање комисија за расветлување на собраниските настани
На дебатата со поднаслов „Кој, што и зошто има да сокрие? Поглед на општата политичка состојба“, која ќе започне во 11 часот учесници ќе бидат проф-др Тања Kаракамишева-Јовановска,проф-др Димитар Мирчев, Сашо Клековски, политички аналитичар и Мирка Велиновска, новинар-аналитичар.
Претседателот Ѓорге Иванов во неделата поведе иницијатива за формирање на објективна непартиска Експертска комисија за утврдување на фактите за настаните од 24 декември 2012 година, во и пред Собранието но и за настаните кои претходеа. Писмото со иницијативата на претседателот Иванов е испратено до Претседателот на Собранието, Трајко Вељаноски, до Претседателот на Владата,Никола Груевски и до Претседателот на Социјалдемократскиот сојуз на Македонија, Бранко Црвенковски. Според предлагаот во комисијата да членуваат уште пет експерти, еден предложен од мене, еден од владејачкото мнозинство, двајца од опозицијата и еден странски експерт, без право на глас, коj би бил предложен од претседателот на Собранието.
Експресно истиот ден лидерот на најголемата опозициска партија СДСМ, Бранко Црвенковски, го одби предлогот на Иванов оценувајќи го како „уште еден обид на актуелната власт да се одложи соочувањето со сопствената одговорност“. Посочи дека „ниеден политички договорен субјект не смее да стане соучесник во очигледното сценарио, според кое настаните пред и за време на 24-ти декември, треба да се претстават во поинакво светло“ и дека политичките фактори во земјата не смеат да дозволат да се повторат ваквите настани.
Премиерот и лидер на владејачката ВМРО-ДПМНЕ Никола Груевски ја прифати иницијативата на претседателот Ѓорге Иванов за независна експертска комисија за испитување на случувањата од 24-ти декември, во и надвор од Собранието, но без присуство на претставници на меѓународната заедница. И покрај забелешките дека учеството на странски претставник не ја легитимира земјата како суверена и самостојна, Груевски во писмениот одговор до шефот на државата истакна дека го прифаќа предлогот сакајќи да покаже конструктивност и отвореност и „гледајќи ја улогата на меѓународната заедница од аспект на нејзината поддршка на интегративните процеси, а нејзиното учество во комисијата како извесен мониторинг на случувањата“.
Претседателот на Собранието, Трајко Вељаноски го прифати предлогот на претседателот на државата, Ѓорге Иванов за формирање на независната експертска комисија за околностите и настаните кои се случија на 24-ти декември, потенцирајќи ја својата убеденост дека Република Македонија „има политички и парламентарен капацитет да ги надмине сите политички несогласувања“.
Во понеделникот и Европската комисија ја поддржа иницијативата на претседателот Иванов за формирање комисија што ќе ги разгледа настаните од 24-ти декември и ги повика ВМРО-ДПМНЕ и СДСМ внимателно да го разгледаат предлогот.
„ЕК целосно ја поддржува иницијативата и ги повикуваме двете страни внимателно да ја разгледаат, бидејќи мислиме дека е многу важно да се истражат и анализираат настаните што претходеа, што донесоа и следеа по настаните во и околу Парламентот тој ден. Ние сметаме дека работата на таквата комисија треба да биде независна, непристрасна и базирана на европските стандарди, земајќи предвид меѓународна експертиза за она што ќе го констатира за тоа да биде објективно“, изјави Петер Стано, портпарол во ЕК./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Професор д-р Атанаско Тунески: Енергетската самостојност е услов за самоодржлива држава, а ЗНАМ нуди мерки кои тоа ќе го овозможат
Денеска Движењето ЗНАМ – За наша Македонија одржа прес конференција на која професор д-р Атанаско Тунески зборуваше за мерките во енергетиката што се предвидени во програмата на Движењето „Проглас за достоинствена Македонија“ за претстојните парламентарни избори.
Професор Туневски рече дека заложбите за самоодржлива држава подразбираат самојстојност во покривањето на потребите од електрична енергија со производство во енергетските капацитети во државна сопственост.
„Најважните цели во делот за енергетиката од програмата “Проглас за достоинствена Македонија” се: изградба на 2 гасни когенеративни електрани (ТЕ-ТО Скопје и ТЕ-ТО Неготино), до мај 2027, во државна сопственост; почеток на изградба на ХЕЦ Чебрен во државна сопственост, со формирање на Дирекција за изградба на ХЕЦ Чебрен, најдоцна 4 месеци по формирањето на новата Влада; избор на стратешки инвеститор за реализација на проектот Вардарска долина, кој содржи 12 хидроцентрали, најдоцна 2 години по формирањето на новата Влада; завршување на изградбата на гасоводите: Неготино (Кавадарци) – Битола, Скопје-Тетово-Гостивар-Кичево, како и интерконективниот гасовод со Грција, со што со гасоводна мрежа ќе биде покриено околу 70% од населението во Македонија,; зголемување на производството на електрична енергија во енергетските капацитети во државна сопственост за најмалку 30% во однос на 2023-та година; намалување на трошоците за производство на електрична енергија во енергетските капацитети во државна сопственост за најмалку 25% во однос на 2023-та година“, рече професор Туневски.
Тој нагласи дека реализацијата на овие цели ќе овозможат енергетска независност на Македонија преку сериозно зголемување на производството на електрична енергија во енергетските капацитети во државна сопственост.
уневски додаде дека Програмата “Проглас за достоинствена Македонија” на Движењето ЗНАМ – За наша Македонија обезбедува максимум за Македонија преку максимум во енергетиката во Македонија.
Македонија
Крмов од Македонска Каменица: Посебен закон за пензионирање на рударите. 20 години стаж и 10 години бенефициран стаж
Денес, Носителот на листата на Левица во ИЕ3 – пратеникот Борислав Крмов, заедно со членот на Президиумот на Левица – Александар Симонов и советникот од Левица, Тони Стаменковски, остварија средба со граѓаните на Македонска Каменица.
На средбите со рударите, имајќи ги предвид проблемите со кои се соочуваат тие, пратеникот Крмов истакна:
,,Во моментов рударите одат во пензија со,
од прилика, 27 годишен стаж и 13 години бенефициран стаж. Во ниедна држава не е така. Секаде е тоа помалку, што значи дека ние како пратеници во Собранието ќе бараме посебен закон за рударство, којшто ќе намали на: 20 години стаж и 10 години – бенефициран стаж”.
Пред граѓаните на Македонска Каменица, Крмов истакна и дел од мерките предвидени во изборната програма на Левица што се однесуваат на инфраструктурата и заштитата на природните ресурси:
– Целосна обнова и проширување на руралната патна инфраструктура на локални патишта – со цел поврзаност
на секое село до главните транспортни артерии;
– Прогласување за национални богатства на водите, шумите, рудите и минералните ресурси и забрана за нивно издавање под концесија!;
– Ограничување на концесионерството на природните богатства и на јавните добра и услуги, со целосна забрана за давање под концесии на водни ресурси.
Во однос на домашното земјоделско производство и мерките за земјоделството и стопанството, Крмов се задржа на следново:
– Заштита на домашното производство (Made in Macedonia);
– Рестартирање или отворање на нови профитабилни државни компании во секоја стратешка гранка од стопанството како: рудници, металопреработувачка индустрија, откупни пунктови за земјоделски и шумски производи, производство на автохтона храна и пијалоци и многу други стопански дејности.
Стимулирање на задругарството и кооперативите, во сите сфери на здружување е една од мерките во Програмата на Левица. Тука се мисли на работнички кооперации, земјоделски задруги итн.
Оттука, Левица се залага за поттикнување на задругарството преку проектот „Мало селско стопанство“ (т.н. аграрни кооперативи) со стручна, техничка и техолошка, т.е. механизациска поддршка на земјоделските задруги.
Крмов од Македонска Каменица ја истакна и програмската мерка за гарантирани цени за најосновните прехранбени продукти и намирници потребни за секојдневен живот на населението.
Ова е само мал дел од над 1000 мерки и проекти, предвидени во Изборната програма на Левица, нагласи Крмов.
Македонија
Почувствуван земјотрес во скопското епицентрално подрачје
Телеметриската сеизмолошка мрежа на Република Северна Македонија, на сеизмолошките станици инсталирани ширум нашата територија, одржувани од Сеизмолошката опсерваторија при Природно-математичкиот факултет во Скопје, после полноќ на 04.05.2024 година во 01 часот и 39 минути, регистрираше земјотрес чиj епицентар припаѓа на Скопското епицентрално подрачје, со Рихтерова локална магнитуда ML1.9.
Според досегашните податоци со кои располага опсерваторијата, земјотресот е почувствуван од населението во градот Скопје и околината, со интензитет од III степени според Европската макросеизмичка скала, информираат од Сеизмолошка опсерваторија при Природно-математичкиот факултет во Скопје.