Директорите на училиштата треба многу сериозно да си ја сфатат работата дека се должни да ги почитуваат законите и да си ги нарачаат учебниците. Оваа година „прогледав низ прсти“, следната година нема да прогледуваме низ прсти затоа што има систем, изјави министерката за образование и наука Весна Јаневска која повторно, одговарајќи на новинарски прашања во врска со недостигот на учебници во некои училишта, порача дека директорите треба да го почитуваат упатството и правилникот за нарачување учебници во МОН.

Пред почетокот на панел-дискусија во Тетово, во рамки на кампањата на МОН „Магијата е во знаењето“, Јаневска кажа дека проблемот со учебниците  е системски решен, укажувајќи дека  одговорноста е на директорите на училиштата доколку не побараат доволен број учебници. Посочи  дека се обезбедени  средства, нови наставни програми и дека се печатат и нови учебници, па фали, како што рече, „само добрата поврзаност меѓу институциите и нивна функционалност“, посочувајќи ги и училиштата.

-Училиштата се дел од системот, директорите на училиштата се исто така дел од системот.  Како што Министерството, Бирото, ДИЦ и сите други институции веќе многу сериозно си ја сфаќаат работата, така и менаџерите на училиштата ќе треба многу сериозно да си ја сфатат работата. Оваа година многу слободно ќе кажам, „прогледав низ прсти“.  Следната година нема да прогледуваме низ прсти. Има систем, има упатство, има правилник.  Директорите се должни да ги почитуваат законите и да си ги нарачаат учебниците.   Зошто повторувам?  Ако тие тоа не го направат, јас немам можност да им обезбедам дополнителна учебници.  Затоа, отсега натаму ако нема учебници, обраќајте се на директорите, не на министерството, одговори Весна Јаневска.

На новинарско прашање дека наставници добиваат договори на дело па се уценувани од политички партии за учество во изборни кампањи пред да добијат решение за вработување на неопределено време, министерката не се согласи и рече дека не е исто како порано.

-Да, свесна сум дека се случувале такви нешта. Апсолутно сум против тоа, апсолутно нема оправдување. Во образованието треба да влезат најквалитетните наставници. Тие коишто се мотивирани да работат со деца затоа што тоа и не е лесна работа. Законот и не е така лош доколку не би се злоупотребувал. Ќе следува и нов закон за наставници, истакна Јаневска.

Таа посочи дека од тој аспект се повеќе се преземат иницијативи за оптимизација на училишната мрежа. За разлика од минатата година кога имало 150  училишта кои работеле во една смена, сега има 200 училишта кои работат така.

-Но, повторно велам, има уште еден податок кој мора да го имаме предвид – дека бројот на ученици е намален и директорите и раководствата на училиштата, вклучувајќи го и министерството, треба да водиме сметка за тоа како се вработуваат наставниците. А бидејќи како министерство и Влада сме направиле проекција за тоа како да ги заштитиме наставниците со додатна настава, дополнителна настава, клубови, изборни предмети, општествено корисна работа. Директорите треба да си се организираат и во оваа концепција да ги најдат часовите на наставниците. Јас веќе пет години зборувам на оваа тема.  Тоа исто така во Македонија ќе мора да се спроведе ако сакаме подобар квалитет и ако сме чесни сами кон себе, сите треба да сме свесни за тоа што мора. Некаде нешто можеби и не мора, но ова мора да се направи. За да постигнеме успех, затоа што си ги застапуваме децата, а кога ги ускратуваме децата си ја осакатуваат државата, рече министерката.

Во рамки на националната кампања „Магијата е во знаењето“, во Тетово денеска беше организирана  третата панел-дискусија „Каква магија се крие зад една петка – минатото и сегашноста во дуел“. Претходно, панел-дискусии се одржаа во Скопје и Прилеп како дел од кампањата на МОН чија цел е  да ја истакне суштинската улога на наставниците и значењето на нивната професија во општеството.

Портпаролката на СДСМ, Богданка Кузеска, на денешната прес-конференција ја критикуваше Владата предводена од ВМРО-ДПМНЕ, истакнувајќи дека реалните економски податоци ги побиваат нивните тврдења за економски бум во земјата.

„Секојдневно, реалните економски податоци и индикатори ги побиваат лагите на Мицкоски и ВМРО-ДПМНЕ за наводен економски бум во државата. Последните податоци за инфлацијата потврдуваат дека, спротивно на уверувањата на власта дека инфлацијата паѓа, таа останува висока и ја јаде куповната моќ на граѓаните. Годишната инфлација во октомври достигна 4,5 проценти, а најголемо зголемување од 7 проценти е регистрирано кај трошоците за храна и безалкохолни пијалаци – основните производи без кои не може да живее ниту едно семејство“, рече Кузеска.

Таа додаде дека цените продолжуваат неконтролирано да растат.

„За 2,8 проценти се зголемени цените на мало во октомври годинава, споредено со истиот месец лани. Најголем раст има кај прехранбените производи – храната поскапе за 6,7 проценти, овошјето и зеленчукот за 4,3 проценти. Растот на инфлацијата и цените е јасен показател дека економските политики на власта се промашени и без никаков резултат. Сметката ја плаќаат граѓаните“, истакна таа.

Кузеска нагласи дека платите и пензиите не го следат растот на трошоците за живот.

„Ова е клучен показател дека секој ден животот станува сè поскап за македонските граѓани. Тие се принудени постојано да кратат, да пресметуваат, да избираат што нема да купат – затоа што приходите не им стигаат. Ова е реалноста. Ова се вистинските проблеми на граѓаните“, подвлече таа.

Според портпаролката на СДСМ, ВМРО-ДПМНЕ нема планови за покачување на платите и отфрла конкретни предлози на СДСМ, како минимална плата од 500 евра или укинување на ДДВ за прехранбени производи. „Сега е јасно: на ВМРО-ДПМНЕ ѝ одговара граѓаните да живеат сè полошо. Целта е да ги обесхрабрат граѓаните и работниците да бараат подобри плати и приходи“, рече Кузеска.

Таа заклучи дека СДСМ ќе продолжи да предлага конкретни политики кои обезбедуваат подобар живот за сите.

„Со ВМРО-ДПМНЕ на власт расте само стандардот на профитерите. Расте експлоатацијата на работниците и сиромаштијата на граѓаните. Ништо друго добро не се случува во државата. СДСМ нема да молчи – и нема да молчат ниту граѓаните“, рече Кузеска.

ВМРО-ДПМНЕ остро реагира на состојбата во СДСМ, нагласувајќи дека партијата е на „стаклени нозе“ и дека нема знаци на вистинска реформа.

„Јавноста беше сведок на историскиот дебакл на СДС на локалните избори годинава, каде партијата освои само шест општини, 126.000 гласови и околу 230 советници, а покрај ова ги изгуби и своите некогашни бастиони“, наведува ВМРО-ДПМНЕ во соопштението.

Од партијата додаваат дека претседателот на СДС, Венко Филипче, постојано најавувал реформи, но тие најави, бидејќи долго време не се реализираат, „со тек на време станаа само празни зборови“.

„Наместо вистинска реформа, гледаме континуитет на истите штетни пракси што ја доведоа партијата до состојбата во која се наоѓа денес“, посочуваат од ВМРО-ДПМНЕ.

Тие предупредуваат дека заевизмот и понатаму доминира во СДС и дека „се додека Филипче и неговиот ментор управуваат со СДС, партијата ќе продолжи да биде партија во слободен пад“.

„Доколку СДС не се консолидира, не се реформира и целосно не го искорени заевизмот од своите редови, партијата ризикува целосно да престане да постои како дел од македонската политика“, додаваат од ВМРО-ДПМНЕ.

Според партијата, потребна е конструктивна опозиција која ќе нуди решенија, а не „пolemичарење во празно“. „Венко Филипче како претседател на СДС не покажа ниту капацитет ниту пак некаква волја да ја извлече партијата од кризата“, стои во соопштението.

„Најавите за реформи на Филипче не се доволни сами по себе. Потребни се конкретни чекори, затоа неговата оставка е единствен логичен чекор и прв услов за СДС да има било каква иднина и можност за реформи“, заклучува ВМРО-ДПМНЕ.