Европската унија (ЕУ) е отворена за прием на нови членки и само со приклучување на државите од Балканот ќе биде заокружена целина

Европската унија (ЕУ) е отворена за прием на нови членки и само со приклучување на државите од Балканот ќе биде заокружена целина.

Ова денеска во Скопје на средбата по повод 9. мај Ден на Европа го рече шефот на мисијата на ЕУ во Скопје амбасадорот Ерван Фуере.

Тој укажа дека граѓаните на Македонија се определени за членство во ЕУ и повтори дека во процесите на евроинтеграцијата треба да бидат вклучени сите фактори во општеството, посочувајќи го притоа, примерот и искуството на Словенија.

На средбата на тема „Од паѓањето на железната завеса во 1989. до проширувањето (на ЕУ) во 2004“ што се одржа во информативниот центар на ЕУ во Скопје, за искуствата во процесите на евроинтеграцијата зборуваа амбасадорите на државите кои, со исклучок на Словенија, до пред 20 години беа железната завеса, а веќе пет години се членки ЕУ.

Чешка е една од државите кои, по интервенцијата на тогашниот СССР во 1968 година, беше цврсто зад железната завеса, а сега е актуелен претседавач со Европската унија. Амбасадорот на Чешка во Скопје Јозеф Браун на собирот зборуваше за тоа дали безбедноста и квалитетот на животот на граѓаните се подобрени по членството во ЕУ.

Словенија прва од десетте држави по големото проширување во 2004.

година беше претседавач со ЕУ. Амбасадорот Алан Брајан Бергант зборуваше за влијанието на воведувањето на еврото врз словенечката економија.

Амбасадорот на Полска во Македонија Дариуш Карол Бачура се осврна на проширувањето на ЕУ од аспект на зајакнувањето на унијата и нејзината политичка улога во светот.

Ефектите на проширувањето врз унгарската економија, беа тема на излагањето на амбасадорот на Унгарија Ференц Кекеши, додека неговиот колега од Словачка зборуваше за усвојувањето на вистински европски идентитет, на собирот на тема „Од паѓањето на железната завеса во 1989. до проширувањето (на ЕУ) во 2004“ што се одржа денеска во Скопје./крај/р/мп