Исламскиот проповедник Фетулах Ѓулен, кого неговиот поранешен голем сојузник а сега огорчен противник турскиот претседател Реџеп Тајип Ердоган го смета за одговорен за неуспешниот обид за воен преврат од 15-ти јули, изразува увереност дека САД, каде што живее од 1999 година, нема да го предадат на Анкара.

„Јасно е дека тоа барање е политички мотивирано и уверен сум дека фактите тоа ќе го покажат. Повеќепати го осудив обидот за државен удар и решително отфрлам каква и да е моја вмешаност во тоа“, вели Фетулах Ѓулен во интервјуто за италијанскиот дневен весник Corriere della Sera.

Во разговорот воден од неговиот дом во американската сојузна држава Пенсилванија, 75-годишниот Ѓулен истакнува дека САД уште не потврдиле дека го добиле барањето за неговото екстрадирање. „Не сум загрижен и ќе соработувам со американските власти“, вели.

Ѓулен долги години беше близок сојузник на Ердоган, но пред неколку години поради политички причини престана пактот меѓу нив. Ѓулен смета дека власти „му удрила в глава“ на Едоган.

„Се чини дека откако се предолго на власт, претседателот Ердоган и неговата партија (Партија на правдата и развојот – AKP) боледуваат од труење со власт. Сега гледам дека премногу верував во него. Жалам што верував дека се искрени во своите намери“, вели исламскиот проповедник кого во Турција го обвинуваат за правење „паралелни структури“ во државните институции.

Ѓулен инсистира дека нема ништо со пропаднатиот пуч во кој загинаа најмалку 260 турски цивили, не сметајќи ги стотината пучисти.

„Доколку поединци кои ги прочитале моите дела, ги слушале моите говори или го поддржувале мојот поглед на светот, учествувале во ударот, тоа тогаш би претставувало предавство на моите темелни вредности“, вали Ѓулен.

Потврдува дека го поддржува турскиот пат кон Европската унија, кој може да биде суспендиран доколку Турција ја врати смртната казна. „Верувам дека членството на Турција во ЕУ е најдобриот начин да се осигури Турција да остане демократска и да бидат заштитени основните права и слободи. Европа има инструменти позитивно да влијае врз Турција“, смета Ѓулен.

Приврзаниците на Ѓулен, особено од движењето „Хизмет“, се цел на масовни чистки во Турција. До петокот речиси 66.000 луѓе осомничени дека се дел од мрежата на Ѓулен се суспендирани од државните служби, а во земјата е прогласена вонредна состојба,

Министерот за внатрешни работи Ефкан Ала изјави дека пасошите им се одземени или поништени на повеќе од 49.000 лица. Потврди дека од неуспешниот обид за пуч на 15-ти јули до петокот биле притворени повеќе од 18.000 луѓе, а 9,677 се уапсени. Според турски функционер, 3.500 притворени лица подоцна биле пуштени на слобода.

Меѓу притворените има неколку десетици новинари и медиумски работници. Обвинителството побара 20 од 21 притворен новинар да бидат формално уапсени, а еден е условно ослободен, објави телевизијата NTV. Јавниот телевизиски сервис TRT објави дека владата поништила 330 новинарски легитимации.

Организацијата за човекови права Amnesty International објави онлајн петиција за заштита на правата и слободите во Турција, а претходно седмицава предупреди дека во притворите се спроведуваат мачења врз приведените./крај/мф/сн

Извор: Макфакс