Српскиот премиер и министер за внатрешни работи Ивица Дачиќ оцени во четвртокот дека Србија со секои нови преговори за Косово има сѐ послаба преговарачка позиција, а од кабинетот на вицепремиерот и министер за одбрана Александар Вучиќ е потврдено дека американската и европската администрација го очекува во следниот круг од разговорите во Брисел.

Премиерот Ивица Дачиќ, според пишувањето на белградските медиуми во четвртокот навечер, во парламентот изјавил дека на Косово за Србите во моментов не се применува дури ни планот на поранешниот специјален меѓународен претставник за Косово Марти Ахтисари и дека за тој план „би требало да се бори”.

„Србија е подготвена за договор, тоа не е спорно, меѓутоа Србите на Косово и Метохија треба да имаат заедница (на општините – з.р.) со овластувања коишто нема да бидат протоколарни туку извршна”, изјавил Дачиќ одговарајќи на прашања од пратениците за текот на преговорите меѓу Белград и Приштина под покровителство на Брисел.

Дачиќ истакнал дека Приштина „нема контрола над северот на Косово”, како и дека „Србија не сака тоа прашање да се решава според косовските закони”, туку смета оти е потребен посебен договор.

„Потребен е посебен политички договор и план за решавање на проблемот. Не слушнав дека со ниеден друг регион како што е северот (на Косово -з.р.) се занимава целата меѓународна заедница”, истакнал Дачиќ и укажал дена ниту на меѓународното ниво веќе прифатениот план не е применет на Косово.

„Вие прашувањето зошто Србија не го прифаќа планот на Ахтисари? Треба да се знае дека дури ни тој на Косово не се применува и дека за него мора да се води борба. Со секои нови преговори имаме сѐ послаба позиција. Доколку тоа е толку едноставно да се примени планот на Ахтисари, зошто самите не го решат и зошто ја повикуваат Србија во преговорите”, изјави премиерот Дачиќ во српскиот парламент.

Дачиќ, исто така, укажал дека ништо не се случило што би го променило ставот на Србија, ниту нешто е прифатено што е поинакво во однос на претходните договори.

Во меѓувреме, Радиотелевизија на Србија (РТС) од кабинетот на вицепремиерот Александар Вучиќ доби директна потврда дека него на следниот круг од преговорите, закажани за 2-ри април го повикале и Брисел и Вашингтон.

Високата претставничка на Европската унија за надворешна и безбедносна политика Кетрин Ештон, упатила, како што наведува РТС, директен повик за вицепремиер Алекснадар Вучиќ, додека американската администрација контактирала директорот на српскиот претседател.

Амбасадата на САД во Белград во четвртокот соопшти дека Вашингтон официјално не учествува во организацијата на преговорите меѓу Белград и Приштина во Брисел, ниту, пак, директно не упатува покани за учесниците во преговорите.

Дали Вучиќ ќе отпатува за Брисел, ќе биде одлучено по договорот со претседателот Томислав Николиќ и премиерот Ивица Дачиќ, а од кабинетот на Вучиќ се соопштено дека нему „не му е важно кој се политичките учесници на преговорите, туку содржината на разговорите и што може да се постигне за српскиот народ на Косово и Метохија”.

Новиот круг преговори меѓу Србија и Косово закажан за 2-ри април во Брисел откако во претходниот, како што истакнаа двајцата преговарачи, премиерите Ивица Дачиќ и Хашим Тачи, е „постигнат напредок”./крај/мф/сн