„Се надеваме дека во извештајот на Европската комисија ќе биде реално вреднуван напредокот и постигнувањата на Република Македонија“

„Се надеваме дека во извештајот на Европската комисија ќе биде реално вреднуван напредокот и постигнувањата на Република Македонија“.

Ова синоќа во Истанбул го изјави шефот на македонската дипломатија Антонио Милошоски, кој исто така изрази надеж дека извештајот ќе содржи препорака за почеток на преговори.

„Во деновите што доаѓаат Република Македонија го очекува извештајот за напредокот на ЕК, којшто се надеваме ќе биде во тонот на нашите постигнувања и дека ќе резултира со одлука на Советот на ЕУ за почеток на преговори за членство“, нагласи министерот за надворешни работи во обраќањето на неформалниот состанок на Процесот за соработка во Југоисточна Европа.

Милошоски притоа изрази надеж дека македонските соседи членки на Европската Унија, Грција и Бугарија, ќе го препознаат својот интерес и оти ќе настојуваат да добиеме позитивна одлука од Советот.

„Ја поздравуваме новата клима за преговори на Хрватска и овој пример покажува колкав може да биде придонесот на дијалогот. Искрено се надеваме дека Турција ќе направи исто така пресврт во преговорите со ЕУ“, рекол Милошоски додавајќи дека Македонија е подготвена да го пренесе своето искуство во делот на евроинтеграциските процеси на Албанија, Босна и Херцеговина, Косово, Црна Гора и Србија.

По состанокот, што заврши во петокот навечер, Милошоски имал неформални средби со колегите од Албанија и од Србија, Илир Мета и Вук Јеремиќ.

Вчера и покрај најавите на медиумите во Грција, Милошоски не се сретна со новиот грчки премиер Јоргос Папандреу на маргините на состанокот на Процесот за соработка во Југоисточна Европа во Истанбул./крај/фо/мп