Републиканскиот претседателски кандидат Доналд Трамп рече дека се надева оти Русија ќе биде способна да ги пронајде илјадниците електронски доверливи пораки од американската дипломатија кои се избришани од приватниот сервер на поранешната државна секретарка Хилари Клинтон, негова сегашна противкандидатка на демократите, истакнувајќи дека тој „нема никакви врски со Русија“, која Демократската партија ја обвинува дека сака да му помогне на претседателските избори на 8-ми ноември.

„Русија, доколку слушаш, се надевам дека ќе можеш да ги пронајдеш 30-те илјади електронски пораки кои недостигаат“, изјави Доналд Трамп на прес-конференцијата на Флорида, алудирајќи на електронските писма кои се избришани од приватниот сервер на Хилари Клинтон кој го користела додека беше шефица на американската дипломатија за официјална преписка, спротивно на американските закони за службената комуникација.

За овој скандал се водеше повеќемесечна истрага од страна на Федералното биро за истраги (FBI) кои и покрај тоа што утврди дека се сторени прекршоци и оти преку приватните сервери Клинтон комуницирала со државни документи класифицирани како доверливи, но се откажа од гонење.

„Тоа ќе биде првпат еден кандидат на голема партија за претседателска должност активно да поттикнува странска сила да го шпионира неговиот противник“, реагираа веднаш со соопштение од изборниот штаб на Хилари Клинтон говорејќи за „прашањето за националната безбедност“.

Клинтон и самата е обвинета од противниците дека ја загрозувала националната безбедност на САД поради тоа што го користела исклучиво приватниот сервер со својата приватна електронска пошта за доверливата преписка/

Покрај тоа, нејзината Демократска партија ја тресе и скандалот со истекувањето на 19.000 електронски пораки од партиските сервери на WikiLeaks од кои се гледа дека од членовите на највисокиот оран на партијата било барано наместо да бидат неутрални да ја поддржат Хилари Клинтон и да конструираат и лиферуваат во медиумите афери за нејзиниот противкандидат на партиските предизбори Барни Сандерс, особено во врска со неговата национално потекло и религијата.

Претседателкaта на Демократскиoт национален комитет (DNC), Деби Васерман-Шулц си поднесе оставка поради овој скандал, а демократите за ова протекување обвинуваат „руски хакери“, но во средата изјавија дека немаат докази за ваквите алузии.

Дури актуелниот претседател Барак Обама, кој застана зад Клинтон во решавачките моменти од париските предизбори во разговорот за NBC News од вторникот алудираше на некаква руска врска со скандалот со пробиените сервери и забележа дека „во Русија многу добро се пишувало за Трамп“.

„Се е можно. Знаеме дека Русите упаѓаат во нашите системи. Не само во владините, туку и во приватните“, додавајќи дека Трамп повеќепати изразувал восхитување од Путин.

„Немам никакви врски со Русија“, изјави Трамп во средата на прес-конференцијата во Дорал на Флорида, додавајќи дека никогаш не се сретнал со рускиот претседател Владимир Путин.

Весникот The New York Times пренесува дека американските разузнавачки агенции се сигурни дека серверите на Демократската парија ги хакирале руските власти, иако не можат да кажат дали станува збор за вообичаена шпионажа или за желба да се влијае врз американските претседателски избори.

„Немам ништо со Путин. Никогаш не сум разговарал со него. Не знам ништо за него, освен дека ќе ме почитува. Тој не го почитува нашиот претседател“ Барак Обама, рече Трамп.

Подоцна на Twitter се шегуваше порачувајќи дека „доколку Русија или некоја друга земја или личност ги имаат 33.000 незаконски избришани мејлови на Хилари Клинтон, можеби би требало да му ги предадат на FBI“.

Кремљ во средата повторно ги отфрли обвинувањата од американските демократи дека Русија е одговорна за хакирањето на серверите на Демократската партија од која протекоа непријатни електронски пораки во врска со внатрепартиските избори за претседателски кандидат, оценувајќи дека станува збор за „хорор приказни“ кои ги измислиле американските политичари и истакнувајќи дека Москва никогаш не се меша во предизборните кампањи во други држави.

„Москва силно настојува да избегне какви и да се зборови кои би можеле да се протолкуваат како директно или индиректно мешање во изборниот процес во која и да е земја. Гледаме дека ткн ‘руска карта’ е на масата на сите политичари во Вашингтон во текот на изборната кампања и дека тие многу често ја користат како адут во играта“, изјави портпаролот на Кремљ, Дмитриј Песков.

„Тоа ме потсетува на друштво во коешто се раскажуваат хорор приказни и потоа сите во него почнуваат да се плашат од сопствените приказни“, рече Песков./крај/мф/сн

Извор: Макфакс