На музичкиот спектакл по повод Денот на независноста, 8 септември, Националната арена „Филип Втори“ прими повеќе од 61.000 посетители, гости од цела Македонија, кои уживаа во концертот „Македонското срце чука во 7/8“, на браќата Тавитјан.

„Безвременската музика и култура што ги продуцира овој простор е доказ за тоа дека Македонија е вечна и вечна ќе остане. Оваа македонска енергија патува ширум Балканот и целиот свет низ песната. Најголемите пејачи на Балканот со огромна љубов и почит ќе ги испеат нашите преубави песни. Оваа вечер сите ние од секаде и од разни нации и култури ќе бидеме Македонци“, рече Гаро Тавитјан.

Позитивната енергија кај сите ја пренесе параолимпијката Оливера Накова – Биковска, која освои златен медал и постигна светски рекорд, во пукање со воздушен пиштол на 10 м., заедно со нејзиниот колега Ванчо Каранфилов и тренерите, кои излегоа сцена.

Официјално, прославата почна со интонирање на македонската химна во изведба на реномираниот оперски пејач Игор Дурловски, а најавеното изненадување, на кое публиката реагираше со аплауз и извици, беа два хеликоптери, што го надлетаа стадионот, веејќи го македонското знаме.

Публиката од сите генерации и од сите крашта на Македонија, потоа имаше можност да ги пее преработките на старите македонски песни – „Калино моме “, „Не кажувај либе добра ноќ“,„Битола, мој роден крај“, „ Деј гиди луди млади години“, „Ој Јано, Јано“,„Сношти сакав да ти дојдам“, „Калеш бре Анѓо“, „Јовано Јованке“,и други.

Македонските песни беа во изведба на Калиопи Букле, Каролина Гочева, Владо Јаневски, Мики Јовановски – Џафер, Ристо Самарџиев, Влатко Лозаноски, Есма Реџепова, Нина Бадриќ, Борис Новковиќ, Горан Каран, Аки Ракимовски, Хари Варошановиќ, Дадо Топиќ, Тереза Кесовија, Јосипа Лисац, Сергеј Четковиќ, Антонија Шола, Александра Радовиќ, Жељко Бебек,..

Пред почетокот на официјалниот дел, публиката ја забавуваа, „Танец“, Елвир Мекиќ и Адела, Тијана Дапчевиќ и Тамара, а секако низ целата програма присутните ги водеше незаменливиот Игор Џамбазов.

Концертот, заврши со огномет, беше директно пренесуван на Македонската радио телевизија и на видео бим на плоштадот „Македонија“.

Во продажба беа пуштени влезници по симболична цена од 20 денари, а сите посетители на влезот на арената го добија албумот „Македонското срце чука во 7/8“.

Средствата од билетите ќе бидат дадени за хуманитарни цели./крај/мф/бб