Комисијата за верификација на фактите можеби нема да ангажира волонтери поради зголемениот обем на работа што ја очекуваат пред локалните избори, туку ќе се обидат да прераспределат државни службеници од други институции.

Претседателот на Комисијата, Томе Аџиев вели дека со новиот Закон за лустрација на новите вработени нема да им требаат безбедносни сертификати, затоа што со новиот Закон сите досиеја се декласифицирани и ќе може да бидат објавени.

„Улогата на комисијата е да утврди кои се соработници. Досиејата се отворени за јавноста во смисла се што ќе утврди комисијата како соработник може да го објави, значи ќе биде достапно за сите граѓани“, изјави Аџиев.

Тој уверува дека нема да има злоупотреби, бидејќи доколку некој од нив го злоупотреби пристапот до досиејата ќе следуваат казни, како што било и досега.

Комисијата ќе бара да се прераспределат вработени од Архивот на Македонија и од Министерството за информатичко општество.

Наспроти уверувањата на Аџиев дека волонтери им се потребни, одредени членови на комисијата не се сложуваат луѓе без безбедносни сертификати на ниво на волонтери да работат во Комисијата за верификување на фактите.

„Апсолутно сметам дека во Комисијата нема место за волонтери. Нашата работа е посебна и ако ние, членовите на Комисијата, имаме безбедносни сертификати и сите други вработени тука, како и хигиеничарката , тогаш мора и оние кои би волонтирале да имаат безбедносни сертификати“, вели членот на Комисијата, Благоја Гешоски.

Според него, во Комисијата со систематизација потребно е да се пополнат околу 40 работни места, а до сега се пополнети само пет, но иако бараат Министерството за финансии да им одобри вработувања, од таму ги одбиваат.

„Кога ќе донесете луѓе однадвор, не може да контролирате што се тие ќе гледаат и ќе го дистрибуираат надвор. Мене ми е токму од тоа страв, имињата да појдат во јавност, луѓето да добијат етикета, да добијат статус дека биле соработници,а понатаму судот нека одлучува дали постоеле докази’, рече Гешоски.

Според Чедомир Дамјановски, член на комисијата, потребни се луѓе во оваа институција, но невозможно е за 24 часа да се донесуваат одлуки, макар и за досие од 10 страници за еден човек.

„Нека биде досие од 10 страници за едно лице, да не зборуваме дека за локалните избори ќе имаме 14.000 кандидати, за да донесеме одлука, членот на комисијата треба да го прочита тоа досие, комисијата да поднесе извештај, да го разгледа извештајот, некој ќе побара да го провери досието, и да не бара да го провери досието за тоа лице, сепак, читањето, извештајот, расправата, донесување одлука за тоа досие е неможно да се направи за 24 часа“, рече Дамјановски.

Според Дамјановски новиот Закон е со одредби кои се „укинати од Уставниот суд, одредби со кои се укинува двостепеноста, се преземаат дејанија без тоа решение да е правосилно, има одредби со кои презумпцијата на невиност воопшто не се почитува има и одредби кои се инкопатибилни“.

Во понеделникот новиот Закон за лустрација беше објавен во Службен весник, а треба да стапи на сила на 17-ти овој месец./крај/фф/бб