Со палење на копии од Букурештанскиот договор, групата Македонски манифест ја одбележа 100-годишницата од неговото потпишување, на 10-ти август 1913 година, кога територијата на Македонија беше поделена меѓу нејзините соседи Србија, Бугарија и Грција.

Од Македонски манифест порачуваат дека евентуалниот нов Букурештански договор мора да се спречи, а ова се однесува пред се на преговорите за спорот за името со Грција.

„Одговорот е само со цврсто национално единство, храброст и самопочит, доблести кои за жал денес ги имаат само малите и столчени, а не империјалните и суетни народи. Ние, групата Македонски манифест за таа цел, под мотото „Името е нашата татковина“, го повикуваме македонскиот народ на единство и надпартиска слога и свест. Го повикуваме да се разбуди и цврсто да застане во исконот на својот идентитет од кој впрочем никогаш и не излегол, да се побуни против неговата изолација од срамните преговори за имети и да им каже не на сите што права сметка во крчма без него“, изјави членот на Иницијативниот одбор на Македонски манифест, Ефтим Клетников.

Преку чинот на палење на копиите од овој договор, групата истиот сака да го прогласи како неважечки и да упати порака дека Македонците нема да потклекнат пред злото што тропа на неговата врата.

Македонски манифест го сочинуваат над 50-тина интелектуалци кои сметаат дека спорот за името не е можен бидејќи целта е бришење на Македонците како народ, а нивната цел е да покренат иницијатива за прекинување на преговорите со Грција и враќање на уставното име на Република Македонија при Обединетите нации./крај/мф/бс