Во Македонија денес царува стравот, се повикува на конечна последна битка, битка за наше истребување и наше исчезнување, а државата е доведена во ќор-сокак, обвини лиедерот на СДСМ, Бранко Црвенковски.

„Во Македонија денес царува стравот, се повикува на конечна последна битка, битка за наше истребување и наше исчезнување. Во една ваква ситуација сите во Македонија имаат право на избор, дали ќе се уплашат, дали ќе замолчат, дали ќе се повлечат на страна или ќе се спротивстават. Ние во социјалдемократскиот сојуз, избор немаме.Ние нашиот избор сме го направиле тогаш кога сме решиле да влеземе во оваа партија.“ Ова им го порача Бранко Црвенковски на членовите на СДСМ, во обраќањето по повод десет годишнината од основањето на Клубот на жените на СДСМ.

„Пред нас се нови, многу потешки предизвици, наша должност и одговорност е со нив да се соочиме и да ги совладаме. Државата е доведена во ќор сокак. Сакаат да владеат, а не знаат како, сакаат да водат но не знаат каде, економијата пропаѓа, сиромаштијата расте, се гази по човечкото достоинство секој ден“ рече Црвенковски.

На СДСМ им требаат храбри и решителни луѓе, порака од Црвенковски до членството на СДСМ. „Да бидеш член на социјалдемократскиот сојуз не значи да ја чекаш победата седнат дома пред телевизор. Да бидеш член на социјалдемократскиот сојуз не значи да имаш членска книшка која ќе ја криеш некаде во фиоката и ќе ја извадиш и ќе мафташ со неа тогаш кога ќе се вратиме на власт. Такви членови ниту ни требаат ниту ни вршат работа. Уште помалку ни се потребни материјалисти и кариеристи, оние на кои што се им се допаѓа се во партијата кога е на власт и ништо не им се допаѓа во партијата кога е во опозиција“ рече Црвенковски.

Тој им ја честиташе десетгодишнината на Клубот на жените и им порача „Јас знам дека вие жените ќе одиграте машки“.На жените им се обрати и пратеничката Цветанка Иванова која се пофали со она што го има клубот направено во борбата за правата на жените.

„Успеавме да извршиме промена на работното законодавство, од аспект на заштита на правата на жената работничка,  бесплатна заштита на репродуктивното здравје на жените, јавно проговоривме и законски го регулиравме прашањето на семејното насилство“ рече Иванова.

„Вие сите знаете каде работи жената , во кои дејности , која плата ја прима, дека секојдневно е под притисок дека ќе го загуби работното место. Да не зборуваме за новиот термин мобинг. Затоа работното законодавство е еден од приоритетите во кој, сојузот на синдикатите и СДСМ треба заеднички да дејствуваме“ порача Лилјана Јанкуловска од ССМ.Публиката во Универзалната сала ја забавуваше Александар Митевски и Виолета Томовска. На јубилејот на жените од социјалдемократскиот сојуз присуствуваа Флора Кадриу од Нова демократија и Ермира Мехмети од ДУИ./крај/фф