Тужениот не поднесе барање за ревизија на меѓупресудата, ниту на крајот ја обжали пресудата, вели судијката Снежана Попчевска

Тужениот не поднесе барање за ревизија на меѓупресудата, ниту на крајот ја обжали пресудата, вели судијката Снежана Попчевска

Без основа сум посочена како жртвено јагне и жигосана како несовесен и нестручен судија што прави грешки и во работата, со што ми се прави штета на угледот, рече вчера Снежана Попчевска, судијка од Основниот суд 1 во Скопје. Таа го водеше предметот и ја донесе пресудата за исплата на 727.800 евра отштета во случајот „Бачило“.

Попчевска тврди дека постапувала законски, совесно, стручно, дека не направила ниту еден пропуст и дека никој не и’ вршел притисок при одлучувањето.

– Долго се воздржував од изјави, чекајќи надлежните органи да заземат став за мојата работа во овој случај. Независно од постапката пред надлежните органи, решив да дадам изјава од правна гледна точка за случајот што траеше 4 години – објасни Попчевска на вчерашната прес-конференција.

Таа рече дека предметот го добила според редовниот распоред на работа во судот и дека првото рочиште го закажала по еден и пол месец. За разлика од мислењето на граѓанскиот оддел на Врховниот суд, судијката рече дека тужбата била уредна и дека во неа биле приложени писмени докази и предложени сведоци. Откако ги извела сите докази и ги сослушала тројцата овчари на оштетениот Иснифарис Џемаили, донесла меѓупресуда дека постои основа за исплата на отштета за овците, коњите, ждребињата и за сирењето што, според оштетениот, биле уништени при гранатирање од хеликоптери на Министерството за одбрана. Таа потврди дека Џемаили не се појавил ни на едно рочиште бидејќи имал застапник. Таа не сметала дека е потребно тој да се сослуша, а тоа не го барал ни тужениот во спорот. Судијката потврди дека во предметот немало фотодокументација од местото на настанот. Министерството преку јавниот правобранител се жалело на меѓупресудата при што било доставено известување дека дента над тој регион летале само невооружени хеликоптери што пренесувале трупи. Апелацискиот суд во Скопје ја потврдил меѓупресудата, а писмениот допис од министерството го отфрлил бидејќи не биле доставени други докази со кои би се потврдило тврдењето.

– Значи тричлен судски совет на второстепениот суд утврдил дека нема повреди во првостепената постапка, дека правилно била утврдена фактичката состојба, а материјалното право правилно применето. Потоа беше поднесена иницијатива за покренување барање за заштита на законитоста до Јавниот обвинител. По разгледувањето на предметот, обвинителството го отфрлило барањето. Тужениот можел по ова да поднесе барање за ревизија, но не го направил тоа – рече Попчевска.

Судијката ја продолжила постапката со вештачење на причинетата штета и на изгубената корист од уништувањето на стоката. Вештачењата на пазарната цена на стоката и на изгубената корист ги вршеле Агенцијата за вештачење „Ексик“ и Земјоделскиот факултет.

Судијката рече дека постоела разлика во висината на цените на едно грло стока во двете вештачења, но Џемаили ги прифатил пониските цени. Тужителот Џемаили барал околу 26 милиони денари отштета, но судијката дел од тужбеното барање одбила и му досудила околу 25 милиони денари.

По жалба на министерството преку јавното правобранителство, скопскиот Апелациски суд ја укинал оваа пресуда и дал упатство да се отстранат разликите на цените за трите вида добиток и на еден килограм сирење и каматата да не се пресметува од денот на поднесувањето на тужбата.

– Ми се забележува што каматата на штетата сум ја пресметала од денот на поднесувањето на тужбата, а не од правосилноста на пресудата. Но, во законот за облигациски односи пишува дека каматата се пресметува од денот на настанокот на штетата – рече Попчевска.

Пресудата потоа им била доставена на странките, но никој не ја обжалил.

– Значи немало незадоволни страни. Не сум направила никаков пропуст и критиките се неоправдано упатени кон мене. Во овој суд работам речиси 30, а на граѓанската област 20 години – рече судијката. (Н.Н.С.)