Ќе се утврдува ли одговорноста за судиите што донеле незаконски и противречени пресуди во случајот „Раштански лозја“? Засега никој од надлежните не сака да се впушти во процена околу можностите да се случи такво нешто.

Ќе се утврдува ли одговорноста за судиите што донеле незаконски и противречени пресуди во случајот „Раштански лозја“? Засега никој од надлежните не сака да се впушти во процена околу можностите да се случи такво нешто.

Претседателот на Основниот суд – Скопје 2, Бекир Шаини, суд кој го водеше овој случај во прв степен, вели дека се’ уште не се официјално известени за одлуката на Врховниот суд, кој неодамна го прифати барањето за заштита на законитоста на Јавното обвинителство на Македонија.

„Она што го имаме како сознание е добиено преку медиумите. Дали има основа за поведување одговорност дополнително ќе одлучиме“, додава Шаини. Инаку, во донесувањето ослободителна пресуда на „Раштански Лозја“ беа вклучени двајца судии, од кои судијката Славица Попчевска (јатрва на Снежана Попчевска од скопска „единица“, за која се води постапка за случајот „Бачило“) во меѓувреме е избрана за апелациона судијка во Скопје, додека Владо Џилвиџиев се’ уште работи во истиот суд. Доколку се постави прашањето за одговорноста на основните судии, по истиот принцип, ќе треба да се утврди и одговорноста на повисоките судии, кои во втор степен одлучувале по истиот предмет и ја потврдиле ослободителната пресуда за четворицата обвинети за „Раштански Лозја“.

Новиот Закон за судски совет ја прошири основата на субјектите кои можат да го иницираат прашањето за утврдување на одговорноста на носители на судска функција. Законот предвидува тоа да може да го иницира член на Судскиот совет, претседателот на матичниот суд, претседател на повисок суд, Општа седница на Врховниот суд. Во составот на Судскиот совет по функција седат и претседателот на Врховниот суд, Дане Илиев, и министерот за правда, Михајло Маневски. Судскиот совет, кој се’ уште не е докомплетиран и работи само со 10 члена, поради блокадата во Собранието околу предлозите на Комисијата за избори и именување и на шефот на државата, се’ уште не почнале со избор и разрешувања судии, кои треба да се изгласаат со двотретинско мнозинство на членовите. За сега, само се констатира престанувањето на судиската функција, кај оние што исполнуваат услови за пензионирање.

Судејќи, барем според првичните изјави, одговорните уште во стартот почнаа да си ја префрлаат топката од едни на други. Претседателот на Судскиот совет, Бекир Исени, го прозва Врховниот суд, првиот човек на највисокиот суд во државата, Дане Илиев, потсети на Законот и рече дека таква можност имаат и пониските судови и член на судски совет. Најсимптоматична беше изјавата на министерот за правда, Михајло Маневски, кој не сакаше да прогнозира дали ќе се побара одговорност за судиите, но рече „не верува дека повредите биле од суштинска природа“.

Додека трае молкот за последиците од одлуката на Врховниот суд за „Раштански Лозја“, во медиумите проструи веста дека еден од четворицата обвинети во овој случај, есккомандантот на „лавовите“ Бобан Утковски, е во комбинација за висока позиција во МВР. Како реакција на ваквите медиумски тврдења, завчеравечер скопската телевизија А1 ја објави веста дека, наводно, стасала писмена порака од Брисел, која била сублимирана во поентата дека Европа не сака да ги види во власта обвинетите за „Раштански Лозја“.

Заедничкиот став, според информации на А1, веќе го испратиле до македонската Влада. Ваквиот став, наводно, бил производ на најавите дека токму Утковски е поставен на висока позиција во Бирото за јавна безбедност, излезена низ полициско хиерархиските пресметки. Телевизијата објави дека Утковски бил експресно разрешен од местото помошник во Бирото. Во извештајот на западните дипломати бил споменат и Љубе Бошкоски, во контекст на заложбите на македонската Влада да го врати предметот од Хрватска.

Од МВР тврдат дека споменатиот Утковски воопшто не бил во комбинација за високо место во Бирото за јавна безбедност. Оттаму, сепак, потврдуваат дека Утковски се појавил пред надлежните од МВР со ослободителната пресуда в раце и барал да биде вратен на старото работно место. Владини извори за „Утрински весник“ негираат дека во каков било пишан документ, за време на формални или неформални средби, воопшто било отворено прашањето на „Раштански Лозја“, како и за преземање на предметот за Љубе Бошкоски од Хрватска.

Извори на „Утрински весник“ од правосудните кругови тврдат дека актуелната власт не крие дека е заинтересирана за враќање на овој предмет од Хрватска и интензивно се проучуваат можностите за такво нешто во меѓународните договори што ја регулираат правната помош и предавањето предмети.