Министрите за внатрешни и за надворешни работи, Гордана Јанкуловска и Никола Попоски во петокот на скопскиот аеродром „Александар Велики“ поделија материјали со информации за задолжителните процедури при престој во земјата.

„Денешниот настан претставува презентација на информативните брошури и плакати кои ќе бидат дистрибуирани до сите државјани на Република Македонија кои престојуваат во странство, странците кои престојуваат на територија на Република Македонија, како и лицата со потекло од Македонија кои планираат да престојуваат на територија на Република Македонија во периодот на летните одмори“, изјави Јанкулоска.

Според Јанкулоска брошурите и плакатите наменети за граѓаните и странците содржат корисни информации за услугите кои ги вршат Министерството за внатрешни работи, Министерството за надворешни работи како и Управата за матична евиденција во делот на издавање и замена на лични карти, патни исправи и возачки дозволи, пријавување престој во земјава, пријавување на новородено дете, издавање на уверение за државјанство и останати услуги за граѓаните. Притоа, таа нагласи дека македонските државјани кои престојуваат подолго од три месеца надвор од Република Македонија, а се државјани и на земјата во која престојуваат, заедно со информативната брошура ќе добијат и картонче за пријавување престој надвор од Република Македонија подолг од три месеца.

„Пополнувањето на ова картонче по ниеден основ не претставува отпуст од македонското државјанство, како што подолг период се шпекулираше во јавноста, туку напротив, нивно олеснување, бидејќи лицата кои го имаат пополнето ова картонче ќе можат при излез од земјава да го употребат пасошот на другата држава. Исклучиво со пополнување и прикажување на ова картонче на граничниот премин ќе можат непречено да заминат од Република Македонија со странска патна исправа, а во спротивно за излез од земјава ќе мораат да поседуваат македонска патна исправа. Картончето може да се побара на било кој граничен премин или во било која полициска станица на територијата на Република Македонија“, информираше Јанкулоска.

Инаку, таа апелираше лицата кои престојуваат во Република Македонија за сите дополнителни информации да се обратат во најблиската полициска станица или на интернет страницата на Министерството за внатрешни работи на која можат по електронски пат да го пријават своето престојувалиште во Македонија, но и по електронски пат да пријават евентуалното незадоволство од односот и работата на полицискиот службеник кој постапил несоодветно со нив. Брошурите и плакатите, пак, се изготвени на македонски и на англиски јазик и ќе бидат дистрибуирани на сите гранични премини, потоа во дипломатско конзуларните претставништва на земјава, како и до македонските организации ширум светот.

Попоски, пак, истакна дека денешната активност е една од низата активности на Владата со цел олеснување на престојот на сите оние кои имаат намера да ја посетат РМ, како и на сите граѓани на Република Македонија кои се или имаат намера да патуваат во странство. /крај/со/ач