Шефот на набљудувачката мисија на Обедиентите нации во Сирија, норвешкиот генерал Роберт Муд, во саботата изјави дека ја запира работата на мисијата поради ескалирање на насилствата во земјата.

Според соопштението, запирањето на работата на невооружените воени набљудувачи со мандат на ОН е последниот сигнал дека не функционира планот на специјалниот претставник на ОН и Арапската лига за Сирија, Кофи Анан, за мирно надминување на конфликтот, бидејќи на повиците за прекин на огнот ги игнорираат и владините војски и вооружената сириска опозиција.

„Набљудувачите не можат да ги спроведуваат плановите за патролирање и остануваат на местата на нивното распоредување до следните упатства“, се вели во соопштението на генералот Роберт Муд.

Тој, исто така, истакнува дека продолжувањето на мисијата е преголем ризик во моментов за самите набљудувачи.

Сириската Опсерваторија за човекови права (OSDH) којашто ја цитираат особено западните агенции, во саботата објави дека седум цивили меѓу кои три жени, се убиени утрово во градот Дума, 13 километри североисточно од Дамаск, во гранатирање од страна на сириската војска. Според Опсерваторијата, во градот Хомс загинале пет цивили. Според активистите на оваа огранизација со седиште во Лондон, во петокот во Сирија во борбите загинале 54 луѓе.

Опсерваторијата побара од генералниот секретар на ОН, Бан Ки-Мун итно да интервенира и да го сопре гранатирањето на градот Хомс, за да може да се евакуираат околу илјада семејства коишто се наоѓаат во обрач./крај/мф/сн