Каде се движи Македонија по Европскиот Совет на 17-ти јуни беше основното прашање на кое денеска се обидоа одговор на дадат членовите на Националниот Совет за евроинтеграции.

Каде се движи Македонија по Европскиот Совет на 17-ти јуни беше основното прашање на кое денеска се обидоа одговор на дадат членовите на Националниот Совет за евроинтеграции.

Опозицијата со критика дека има застој во реформскиот процес во земјата, додека позицијата со став дека прашањето со името е единствената пречка до одредувањето на датум за старт на пристапните преговори. Според шефот на дипломатијата Антонио Милошоски, неодредувањето на датум за старт на преговорите со Македонија на последниот Европски Совет е недостаток на волја од една земја членка да даде конструктивен придонес и Европската Унија политички да ја верифицира препораката на Европската Комисија. Тој смета дека оваа ситуација може негативно да се одрази кон севкупното расположение за Европската Унија во земјава. „Ќе треба да вложиме дополнителни напори да се бориме со одредената доза на разочарување, фрустрации и демотивираност кои се јавуваат кај општествените, политичките и другите чинители во Република Македонија како резултат и последица на ваквиот третман или одреденото статус-кво што не соодветствува со заслужената можност за исчекор напред“, рече Милошоски. Вице-премиерот Васко Наумовски рече дека Македонија работи на изнаоѓање на взаемно прифатливо решение со Грција што нема да ги загрози националните интереси на земјата. Вели дека исполнувањето на критериумите за членство е приоритет на Владата. „Свесни сме дека по последните циклуси на проширување, критериумите за членство можеби се  затегнати, односно, можеби, од сегашните држави кандидати се бара многу повеќе отколку тоа што било случај со државите на дел од Унијата во 2004-тата и 2007-та година. Но ние како држава сме подготвени да ги исполниме и тие дополнително затегнати критериуми“, рече Наумовски. Шпанскиот амбасадор во земјава, Хозе Мануел Паз и Агерас, на крајот од шпанското претседателство со Унијата ја повтори декларираната заложба за продолжување на проширувањето кон земјите од западниот Балкан. „Сметам дека мапата на Европа нема да е комплетна без вас“, рече Агерас. Опозицијата со став дека Македонија на 17-ти јуни доживеала неуспех поради тоа што воопшто не се нашла во заклучоците на Европскиот Совет. Бараат конкретна работа на потребните реформи, но и во процесот за надминување на проблемот со името. „Ако продолжиме со реформите како во изминатите шест месеци, тогаш не ни бега и фактички да ја изгубиме препораката за преговори, затоа што степенот на реформи е недоволен, слаб и уназадувачки. Мора Македонија навистина да излезе од дупката во која што, како и самата, да се закопува, заради тоа што ги изгуби пријателите, го изгуби реформскиот залет и сега се наоѓа во извонредно неповолна состојба“, рече Радмила Шеќеринска од СДСМ. „Цел свет знае дека Македонија е во право. Едноставно, сите разумни луѓе коишто рационално размислуваат говорат дека ова е апсурдна состојба во која што не доведува Грција. Меѓутоа, тоа е тоа. Така функционира Европската Унија. Ако сакаме да бидеме членки на тој клуб, ние едноставно мора да се привикнеме на условите што ги диктираат тие членки“, рече пратеникот Тито Петковски од НСПД. За пратениците од позицијата, прашањето со името е единствената пречка за отпочнувањето на пристапните преговори со Унијата. „Никој освен Македонија нема ваков, сега видлив критериум, да го промени своето уставно име. Сите земји имаат проблеми од различна природа, но не од таква природа, поврзана со идентитетот, јазикот, културата и се што значи одбележување на културата и постоењето на овој народ“, рече Силвана Бонева од ВМРО-ДПМНЕ. „Немаме никаква нова состојба. Состојбата по 17-ти јуни едноставно е едно продолжување на состојбата што се случи во 2008-ма година на самитот во Букурешт, каде што беше констатирано дека Република Македонија ги исполнува сите неопходни критериуми за полноправно членство во НАТО, но алијансата едноставно ја стави својата блокада“, рече Петар  Поп Арсов од ВМРО-ДПМНЕ. Претставниците на партиите на Албанците, побараа, како што рекоа, носење на историски одлуки, што на земјата ќе и овозможи напредок во евро-атлантските интеграции. „Ова е неправедно и импонирано прашање, но тоа е и одлука без која нема членство ниту во Европската Унија, ниту во НАТО“, рече Џевад Адеми од ДУИ. „Мислам дека ова не треба да биде само декларативна заложба, туку треба да имаме конкретни заложби во пракса“, рече Флора Кадриу од Нова Демократија. Дебатата на Националниот Совет за евро-интеграции доаѓа пред јулскиот состанок на Советот за стабилизација и асоцијација, кога, според дел од пратениците, ќе биде упатена политичка порака до каде е Македонија во однос на исполнувањето на критериумите за членство во Унијата. /крај/ач