Македонија
Од јуни жените ќе бидат повикувани на претходно закажани мамографски прегледи
Во јуни треба да стартува новиот проект на министерството за здравство во делот на раната детекција на малигните заболувања, со кој жените ќе бидат повикувани на бесплатен преглед во претходно закажан термин.„Оваа година жените нема да има потреба да се јават за да закажат бесплатен преглед, ние ќе ги повикуваме на термин. Подготовките технички веќе се завршени и очекуваме во јуни да стартува тој проект за повикување на жените на претходно закажан термин“ – рече министерот за здравство Бујар Османи на денешната посета на поликлиниката „Јане Сандански“.Мамографските прегледи ќе можат да се прават во сите служби кои се предвидени со програмата, а првиот преглед и понатаму ќе биде бесплатен, додека дополнителните контролни прегледи и понатаму ќе подлегнуваат на партиципација што е законски предвидено.Според Османи новиот проект ќе значи поголема свест и информираност кај жените.„ Бројките се импресивни во делот на раната детекција на малигните заболувања. Има зголемен број на пациенти каде што е зголемена свесноста за потребите од рано детектирање на малигни заболувања, особено на дојка. Околу 1.500 прегледи се направени во минатата година во рамките на програмата. Тоа е бројка која најјасно покажува кој е успехот на оваа програма. 40.000 прегледи се направени во 2009 година за разлика од само 3.500 во цела држава пред 6 години“ – рече ОсманиМинистерот изрази подготвеност за целосно расчистување на случајот со осумгодишната Марија Георгиевска која почина на инфективната клиника. Поради незадоволството на семејството со првиот извештај, на барање на Османи деновиве треба да биде извршен уште еден стручен надзор, за да се утврди дали е точна констатацијата на лекарскиот тим на клиника кој што смета дека се запазени сите процедури, предвидени во медицината, базирани на докази или пак дали е точен ставот на семејството дека причина е лекарска грешка.„Ставот на првичната комисија е дека не можат да донесат конечен заклучок, бидејќи семејството не дозволува обдукција за да може да се констатира што е причината за смртта. Бидејќи семејството искажа незадоволство од тој извештај за да им пратам порака дека нашата намера е да одиме до крај со расветлување на случајот, јас предложив уште еден стручен надзор за да ги споредиме двата извештаи. Да заврши деновиве и вториот стручен надзор и двата извештаи ќе ги објавиме за да ги осигураме семејството дека ние како министерство не сакаме никого да криеме и штитиме доколку имало лекарска грешка, но не сакаме ниту да осудиме некого без да имаме докази“ – вели Османи.Во својата редовна посета на здравствените домови низ државава Османи ја посети поликлиниката „Јане Сандански“ која е целосно реконструирана. Поставен е целосно нов покрив, отстранет е стариот азбест и завршени се градежните работи околу новата фасада. крај/ к.с.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
ВМРО-ДПМНЕ: СДС коваат две сценарија – 1. Бојкот на избори, 2. Влада со ДУИ, и Али да одлучува кој кое министерство ќе го има
СДС знаат дека ќе изгубат катастрофално во вториот изборен круг, и наместо чесно да го прифатат поразот, тие мислат ќе го изманипулираат народот. СДС деновиве коваат две сценарија кои во суштина се завера против Македонија, велат во утринското соопштение од ВМРО-ДПМНЕ.
„Првото е сценарио на бојкот. Европјаните и демократите од СДС кои се утепаа од крадење, сакаат да бојкотираат зошто народот не ги сака и ќе доживеат тежок дебакл. Со ова сценарио сакаат свесно да предизвикаат уставна криза. Второто сценарио е пазарџиска делба со ДУИ на ресори и министерства, каде Ковачевски му оставил на Ахмети сам да одреди колку министерства ќе му даде на СДС и кои. Толку е голем очајот, што Ковачевски прифаќа се, па и сите министерства да ги води ДУИ, не сфаќајќи дека поразот е и поради тоа што партијата го изгуби идентитетот трчајќи по тоа да му се угоди на Ахмети“, велат од партијата.
„И двете сценарија кои се во план во СДС се губитнички за Македонија и удираат по нејзините темели. Решението е масовна излезност. Мобилизација и масовна излезност. Решението и за бојкотот и за пазарџиската поделба на ресори е масовно гласање на избори. Колку поголема излезност толку поголема ќе биде победата над СДС и ДУИ. И СДС и ДУИ мора да знаат две работи, првата е дека ДУИ заедно со СДС оди во опозиција. А втората е дека ќе одговораат за криминалот. Промените и победата е во рацете на народот. За да се запрат СДС и ДУИ и да нема уцени потребна е масовна излезност. За Македонија повторно да биде твоја“, се наведува во соопштението.
Македонија
Нови 27 случаи на голема кашлица, најмногу во Скопје
Нови 27 случаи на голема кашлица се евидентирани од 19 до 25 април, покажува најновиот извештај на Институтот за јавно здравје.
Според извештајот, најголем дел од случаите се пријавени во рамките на епидемијата во Скопје – 20, а пријавени се заболени и во Битола – три, Куманово – две лица и по еден случај во Тетово и Демир Хисар.
„Возраста на заболените се движи од еден месец до 54 години, а најголем број случаи се од возрасната група од 10 до 14 години. Во однос на вакциналниот статус на заболените, 15 лица се некомплетно вакцинирани, невакцинирани или имаат непознат вакцинален статус, 11 се комплетно вакцинирани и еден случај е вакциниран согласно возраст“, пишува во извештајот.
Заклучно со 25 април, во државава се регистрирани вкупно 516 случаи на голема кашлица, со инциденца од 28,1/100 000 жители. Тоа претставува неколкукратно зголемување на бројот на заболени во однос на изминатиот петгодишен период – 2019-2023 година, кога се регистрирани вкупно 10 случаи. Најголем број лица живеат во Скопје – 412 или 79,8 отсто, со зафаќање на седумнаесет различни општини. Во рамките на епидемијата во Куманово, пријавени се 29 заболени лица или 5,6 проценти, а случаи се пријавени и во други 16 градови низ државата.
254 лица се од машки, а 262 од женски пол.
„Епидемиската крива укажува дека појавувањето на нови случаи на голема кашлица започнува во првата недела од 2024 година. Согласно податоците од евиденцијата на пријавувањето – за седмодневен период од понеделник-недела, се забележува континуиран пораст на бројот случаи на неделно ниво, до 12-та недела. Од 12-та недела, со мали варијации, бројот на пријавени случаи се намалува“, се додава во извештајот на ИЈЗ.
Од заболените, хоспитализирани се 73 лица. Од нив, 59 на возраст до четири години. Најголем број од случаите – 51 или 69,9 проценти, се хоспитализирани во УК за белодробни заболувања кај деца во Козле. Од вкупниот број хоспитализирани лица, 67 се испишани. Во просек, заболените биле хоспитализирани по девет дена, покажуваат податоците на Институтот.
Од 18 јануари до 25 април годинава, дадени се вкупно 42.857 дози вакцина што содржи компонента против голема кашлица.
Македонија
ЦУК: 1.764 повици на бројот за итни случаи 112 во последното деноноќие
Центарот за управување со кризи (ЦУК) информира дека имало вкупно 1 764 повици на Единствениот повикувачки број за итни случаи 112 во ЦУК во последното деноноќие, од коишто „реални“ повици биле 52,44%, а 47,56% биле за други потреби на граѓаните што не биле итни. Кон Полиција биле упатени 62,93%, кон Итната медицинска помош 33,59%, а кон пожарникарите 2,32% од реалните повици кон 112 во ЦУК. Инаку, имало 842 повика за итни случаи на 112 за во ЦУК, што се вкупен збир од тие што биле за комбинирано решавање од „реалните“ повици (1,16%) и на тие што се именувани како „неитни повици“(47,56%). Сите тие биле предмет на примање, на обработка во ЦУК, а и на директно координирање за нивно решавање со институции и служби во Системот за управување со кризи (СУК).
Во последното деноноќие немаше евидентирани пожари на отворен простор. Имало само урбани.
Сите итни случаи се пријавуваат на Единствениот повикувачки број за итни случаи 112 во ЦУК, особено кога граѓаните имаат животозагрозувачки ситуации. Истовремено, ЦУК информира дека е потребно и е корисно да се следат препораките и информациите од медиумите за превенција, а и за реагирање при итни случаи.