Лидерите на земјите-членки на Г-20 во Франција го започнуваат самитот под товарот на загриженоста од влошување на должничката криза во еврозоната по најавата за референдум во Грција за мерките за излез од кризата.

Лидерите на земјите-членки на Г-20 во Франција го започнуваат самитот под товарот на загриженоста од влошување на должничката криза во еврозоната по најавата за референдум во Грција за мерките за излез од кризата.

Вчера земјите од еврозоната ја замрзнаа траншата од осум милијарди евра од договорената помош за Грција, а натамошната исплата ќе зависи од референдумските резултати во Грција. Истовремено, Кина одби да инвестира во Европскиот фонд за финансиска стабилност (ЕФСФ) додека не се разјасни ситуацијата со Грција.

Грчкиот премиер пред средбите со лидерите на еврозоната, на кои треба да ја објасни својата одлука за референдум, изјави дека референдумот е, всушност, одлука дали Грција да остане во зоната на еврото или не.

„Верувам дека постои широк консензус кај грчкиот народ и тој наскоро ќе се изјасни“, рече тој. Референдумот треба да се одржи на четврти или петти декември.

Денеска на маргините на самитот на Г-20 (група од 20 најразвиени економии и економии со најбрз развој) состанок треба да одржат претседателите на САд и на Франција, Барак Обама и Никола Саркози, на кој ќе разговараат за најновиот развој на должничката криза во еврозоната.

Вчера Британија, која е голем скептик за ЕФСФ, соопшти дека е подготвена да поддржи зголемување на финансирањето на Меѓународниот монетарен фонд (ММФ) за стабилизирање на еврото.

Во меѓувреме, се повеќе се засилуваат стравувањата од неконтолиран банкрот на Грција. Многу економисти стравуваат дека ако Грција го напушти еврото, тоа може да доведе до префрлање на банкротот ширум еврозоната, затоа што инвеститорите и обичните штедачи стравуваат дека и нивните влади ќе го следат примерот а Грција.

„Постои голема веројатност Португалија и Ирска исто така да посакаат да го напуштат еврото, а зголемување на цената а задолжувањето ќе има и за Италија“, вели за BBC Доналд Хана од Fortress Investment Group. Тој објаснува дека ако Грција се одлучи да ја напушти еврозоната, земјата ќе мора да и се врати на драхмата, која најверојатно ќе има многу ниска вредност во однос на еврото.

Таквиот потег, предупредува Хана, драстично ќе ја зголеми вредноста на долгот во евра и ќе резултира со банкрот на сите фирми и компании кои се изложени на таквите долгови.

Германската канцеларка пред почетокот на самитот изјави дека лидерите на еврозоната сакаат Грција да стане дел од нив, но истакна дека последните потези на грчката влада се закануваат да го дестабилизираат целиот регион.

„Еврото мора да остане стабилно. Ние би сакале тоа да го постигнеме заедно со Грција, но стабилноста е приоритет“, рече Меркел.

„Постојат правила кои го сочинуваат пактот за стабилност на еврото. Сега зависи од Грција дали таа сака авантурата да ја продолжи со нас или сама. Европските даночни обврзници своите пари ќе ги дадат само ако правилата се почитуваат до последната запирка“, се надоврза францускиот претседател Саркози.

Иако должничката криза во еврозоната започна со помалите економии, како Грција и Ирска, најголемата закана е дека, ако не се стави под контрола навремено, кризата ќе ги засегне и поголемите економии, како Италија и Шпанија. Тоа, пак, ќе му наштети на развојот во целата еврозона, која се уште не е заздравен ниту од глобалната финансиска криза.

Италија, чии долгови се значително поголеми од тие на Грција, во наредните 12 месеци ќе се соочи со достасувањето на стотици милијарди долари долг. Истовремено, на оваа земја и е се потешко да најде пари на меѓународните финансиски пазари. Цената на зајмувањето за Италија порасна на 5,1 процент на годишно ниво, највисока од кога се приклучи кон еврото и неспоредливо поголема од 0,3 проценти, колку што плаќа Геранија.

Италијанската влада се согласи да спроведе мерки за штедење, кои на синоќешниот вонреден состанок од неа ги побараа останатите членки на еврозоната, во обид да ги убеди дека си ги завршува своите обврски во поглед на справувањето со долговите. /крај/bbc/сс/