Повеќе десетици илјади државни функционери, вработени во јавните претпријатија и во државните органи од средината на април пополнуваат обемни анкетни листови за нивната имотна состојба и за имотите што ги имаат нивните деца, браќата и сестрите и родителите.

Повеќе десетици илјади државни функционери, вработени во јавните претпријатија и во државните органи од средината на април пополнуваат обемни анкетни листови за нивната имотна состојба и за имотите што ги имаат нивните деца, браќата и сестрите и родителите. Анкетните листови ги нарача и ги праќа Државната комисија за спречување на корупцијата. Државните службеници и другите буџетари се изненадени од потегот на комисијата и тврдат дека пополнувањето на листовите е во спротивност на Уставот.

– Знаат ли во Државната комисија за спречување на корупцијата дека поттикнуваат „кодошење“, која е во спротивност на Уставот, бидејќи речиси 100.000 вработени во јавните претпријатија и во органите на државната управа со давање податоци за имотната состојба на своите блиски ќе опфатат најмалку 500.000 граѓани на земјата – вели вработен во државната управа.

Освен за документите и за анкетните листови, секој вработен треба да плати и за заверување на документите на нотар, што сите тие државни службеници ги чини по 200 денари. Од Агенцијата за државни службеници, која е надлежна само за вработените во државните органи, велат дека постапката не е спорна и дека е во согласност со изменетиот текст на Законот за спречување на корупцијата од ноември минатата година. Оттаму се повикуваат на членот 34 од овој закон. Во тој член, пак, пишува само дека доколку лицето е „избран или именуван функционер, или одговорно лице во јавно претпријатие или во јавна установа или службено лице при изборот или при именувањето треба да пополни анкетен лист за својот недвижен имот“. Вработените тврдат дека овој член не се однесува на сите вработени и тврдат дека комисијата без знаење на Владата своеволно го изменила и го дополнила законот со друг член. Тоа, според нив, е членот 82 според кој, обврската за пополнување на листовите е задолжителна и за сите вработени.

Драган Малиновски, претседател на антикорупциската комисија, вели дека пополнувањето на листовите е во согласност со измените на Законот што ги усвоило собранието. Тој вели дека и покрај тоа што е голем бројот на лицата што ќе треба да ги кажат податоците за своите имоти, комисијата е решена да ги собере сите анкетни листови.

Во Владата немаа коментар за пополнувањето на овие анкетни листови. Владини државни службеници првпат слушаа за тоа дека сите вработени во државната управа и во јавните претпријатија треба да пополнуваат анкетни листови.