Иако е мала земја без излез на море, Македонија има направено значителен напредок во институционализирањето на управувањето со одржливиот развој, порача вицепремиерот Владимир Пешевски во своето обраќање на Конференцијата за одржлив развој на ОН во Рио Де Жанеиро.

Потенцирајќи го значењето на процесот за одржлив развој, Пешевски ги презентираше активностите што Македонија ги превзема во ова поле, координирани преку работата на Националниот Совет за одржлив развој.

Пешевски истакна дека Македонија иако е мала земја, без излез на море, има направено значителен напредок во институционализирањето на управувањето со одржливиот развој, како и во спроведувањето на соодветни политики, особено во делот за употреба на обновливите извори на енергија.

Тој посочи на конзистентноста на препораките содржани во усвоената Национална стратегија за одржлив развој со усогласениот текст на документот „Иднина која ја сакаме“ за кој е постигната согласност и се очекува да биде усвоен на Конференцијата Рио + 20.

Вицепремиерот ја истакна усогласеноста на македонските со европските политики за одржлив развој, при потенцирајќи ја потребата од постоење на разлика во одговорностите на земјите со различен степен на развој.

Во своето обраќање Пешевски ја нагласи и потребата од праведна распределба на товарот на одржливиот развој помеѓу државите, но истовремено очекувајќи заедничко прифаќање на одговорностите за историските и кумулативните загадувања на глобално ниво. Во таа насока вицепремиерот Пешевски ја поддржа иницијативата за воспоставување на меѓународен механизам за трансфер на технологии и знаења поддржани со финансиски механизми, кои би придонеле за севкупно подобрување на состојбата со одржливиот развој.

На Конференцијата учествуваат 86 претседатели на држави и влади, како и високи претставници на повеќе од 150 држави од светот. Паралелно, Конференцијата е следена од претставници од невладиниот сектор и други засегнати групи.

Целта на Конференцијата е да се реафирмира политичката заложба за одржлив развој, преку проценка на прогресот и слабостите во спроведувањето на одлуките направени на главните самити претходно.

Македонската делегација е предводена од вицепремиерот задолжен за кономски прашања Владимир Пешевски, а во состав на делегацијата е Министерот за животна средина и просторно планирање, Абдилваќим Адеми, експерти од тој ресор како и претставници од Министерството за надворешни работи. /крај/со/ач