Свет
Пет кафулиња затворени оти не издавале фискални
Инспекторите на Управата за јавни приходи (УЈП) викендов затворија пет кафулиња во центарот на Скопје оти не издавале фискални сметки.
ПОЛНОЌНА КОНТРОЛА НА УЈП ВО СКОПЈЕ
Инспекторите на Управата за јавни приходи (УЈП) викендов затворија пет кафулиња во центарот на Скопје оти не издавале фискални сметки. Во контрола на 15-ина локали на најфреквентните скопски места, улицата Македонија и кејот 13 Ноември, инспекторите ги затворија кафе-баровите "Тренд", "Картел", "Барселона", "Чекпоинт" и дискотеката "Процес".
УЈП, по инспекцискиот надзор во овие пет локали, официјално соопшти дека инспекцијата утврдила дека кај сите се појавува неевидентиран готовински промет преку фискалните каси, неуредно користење на фискални апарати и неиздавање на фискални сметки.
"На сите пет угостителски субјекти, покрај парична казна за сторен прекршок, изречена им е забрана за работа во период од 30 дена", се вели во официјалното соопштение од УЈП. Правниот субјект се казнува со 1.000 евра, додека директорот или управителот на локалот со 500 евра.
По оваа акција, во саботата попладне инспекторите исконтролирале уште десетина други кафе-барови и дискотеки, но немало неправилности во работењето. Притоа инспекторите повторно влегле во кафе-барот "Тренд", чии газди сами ги симнале пломбите поставени претходната ноќ, со објаснување дека инспекторите направиле контрола само во ноќниот клуб, а не и кафулето кое работи во текот на денот. Портпаролот на УЈП, Весна Новковиќ, вчера изјави дека и во контролата на дневниот дел од "Тренд" биле утврдени неправилности во работењето. Против газдите на локалот ќе поднесат кривични пријави зашто самоволно ги симнале пломбите.
Според Новковиќ, УЈП викендов направила редовна инспекциска контрола на спроведување на Законот за регистрирањето на готовинските плаќања, а преку претходни анализи во Управата бил направен изборот на локалите во кои влегоа инспекторите. Поради недоволниот број инспектори, кои биле придружувани од полиција, првата ноќ УЈП влегла само во пет локали.
Газдите на затворените локали вчера реагираа дека не се затворени поради неиздавање фискални сметки.
(Т.Ј.)
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Хамас тврди дека негова делегацијата оди во Каиро за да разговара за примирје во Газа
Делегација на исламската милитантна група Хамас денеска ќе замине за Каиро за да ги продолжи разговорите за можен договор за прекин на борбите во Газа, соопшти групата доцна синоќа, пренесе ДПА.
– Додека го нагласуваме позитивниот дух со кој раководството на движењето одговори кога го проучуваше предлогот за прекин на огнот што го доби неодамна, одиме во Каиро во истиот дух за да постигнеме договор, се вели во соопштението на Хамас.
Се додава дека Хамас и „палестинските сили на отпорот се решени да го созреат договорот, на начин што ќе ги исполни барањата на нашиот народ за целосен прекин на агресијата, повлекување на окупациските сили, враќање на раселените, олеснување за нашите луѓе, почеток на реконструкција и комплетирање на сериозен договор за размена“.
Според извор од Хамас, има уште некои точки кои треба да се разговараат и имало потреба од повеќе појаснувања. Откако тие ќе се разјаснат, движењето ќе го објави својот конечен став.
– Но, можам да ви кажам и според изјавата што штотуку ја испрати движењето, одговорот ќе биде позитивен, изјавил изворот од Хамас за ДПА.
Месечното посредување на Египет, Катар и САД меѓу Израел и Хамас допрва треба да резултира со пробив. Во последните денови се интензивира и дипломатскиот притисок за постигнување договор.
Свет
Американски разузнавачи со предупредување: Русија и Кина подготвуваат заедничка инвазија
Американското разузнавање има информации кои укажуваат дека Русија и Кина тесно соработуваат за голем број воени прашања, вклучително и потенцијална инвазија на Тајван.
Такво нешто ја поттикна американската администрација да планира како да спречи такво сценарио, пренесува „Блумберг“.
„Ова е првпат Кина и Русија да соработуваат за прашањето на Тајван. Кина дефинитивно сака да соработува со Русија во оваа насока“, рече шефицата на Националната разузнавачка служба Аврил Хејнс за време на нејзиното сведочење пред Конгресот.
Републиканскиот сенатор Мајк Раунд од Јужна Дакота ја праша Хејнс за такво сценарио за време на сослушувањето на Комитетот за вооружени служби во Сенатот. Тој праша и дали Пентагон планира одговор на таквата можност, бидејќи големи се шансите во случај на конфликт со една земја да биде отворен потенцијален конфликт со една или повеќе од нив. Тоа би влијаело на многу работи.
„Секако дека постои можност да се случи такво нешто. Одговорот на тоа прашање зависи од сценариото што би се развило“, рече Хејнс, додавајќи дека разузнавачките проценки укажуваат дека постои зголемена соработка во партнерството „без забрани“ меѓу Русија и Кина во секој општествен сектор – политички, економски, воени, технолошки“, пренесува медиумот.
Нејзините изјави, според написите ги потврдил и генерал-полковник Џефри Круз и нагласил дека ситуацијата внимателно се следи и дека „тие се подготвени доколку се случи несакано сценарио“.
Медиумот анализира дека треба да се знае дека Русија, Кина и Иран во средината на март одржаа заеднички воени вежби наречени „Поморски безбедносен појас – 2024“ во Оманскиот Залив и Арапското Море.
Свет
Медведев до Швајцарија: Ти благодарам, земјо на сирењето и часовниците
Дмитриј Медведев, поранешен руски претседател и актуелен заменик на Советот за безбедност, рече дека конференцијата за прекин на огнот во Украина ќе биде уште еден доказ за пропаѓањето на „мировниот план“ на украинскиот претседател Володимир Зеленски.
Швајцарската влада претходно објави дека Русија во моментов не е меѓу десетиците поканети земји, додавајќи дека е отворена за нејзино учество, но дека Москва не е заинтересирана. Берн го најави собирот во јануари, велејќи дека го организирал на барање на украинскиот претседател Володимир Зеленски.
Медведев објави денеска на Телеграм. „Која е користа за Русија од швајцарската „мировна конференција“? Придобивката е трикратна. Прво, тоа ќе биде уште еден доказ за пропаѓањето на таканаречениот мировен план на идиотот Зеленски.
Второ, тоа ќе стане видлив доказ за целосната немоќ на сегашните западни елити, кои извршија болна самокастрација на нивната способност да го прекинат воениот конфликт. Згора на тоа, по директна наредба на група сенилни лекари од Вашингтон.
Трето, тоа ќе им овозможи на нашите вооружени сили да продолжат да ја чистат територијата на Мала Русија од неонацистите без мешање или сметка за нечии глупави „мировни иницијативи“ и сите ние да извршиме скрупулозна работа во насока на конечниот колапс на политичкиот режим на Украина и брзото враќање на нашите оригинални територии во Руската Федерација. Ти благодарам, земјо на сирењето и часовниците“, напиша Медведев.