Опозиционата СДСМ в понеделник ја обвини претседателката на антикорупциската комисија Мирјана Димовска дека борбата за спречување на корупцијата ја претворила во лов на вештерки

Опозиционата СДСМ в понеделник ја обвини претседателката на антикорупциската комисија Мирјана Димовска дека борбата за спречување на корупцијата ја претворила во лов на вештерки.

„Според последното соопштение од 21 октомври Антикорупциската Комисија иницирала до Јавното Обвинителство кривично гонење против двајца градоначалници на Струмица, врз основа на ревизорски извештај за злоупотреба на службено овластување во првото тромесечје од 2005 година“, рече портпаролот на СДСМ, Емилијан Станковиќ на прес-конференција и додаде дека еден од градоначалниците за кои е поведена постапка е Зоран Заев.

Станковиќ истакна дека останува енигма за тоа како е можно за Мирјана Димовска да не постои сомневање за злоупотреби во врска со јавните набавки во МВР за маици и панцири преку фирмата „Линк Медиа Плус“ која била кривично гонета за затајување данок.

„Антикорупциската комисија пред една недела објави дека за неа не е ништо спорно што една иста фирма организирала дочек на Нова Година, набавувала билборди, ХТ3 опрема, маици, ознаки, па дури и формациска опрема-панцири од МВР во вредност од 700 илјади евра“, потенцираше Станковиќ.

СДСМ ја праша Димовска зошто молчи за ревизорските извештаи за министерствата за транспорт и врски, надворешни работи, правда и Владата, каде е констатирано неодговорно и ненаменско трошење како и сомневање за криминал во трошењето милионски суми народни пари.

„Дали за Мирјана Димовска не е сомнително што половина од буџетот на Владата за 2008 година, или речиси десет милиони евра, премиерот Груевски од својата омилена ставка стоки и услуги ги потрошил на кампањи, реклами и соопштенија или таа има мандат да се занимава само со работењето на функционерите на СДСМ?“, прашува опозицијата и додава да продолжи така бидејќи колку и да се труди нема да наиде на никакви незаконитости во работењето на функционерите на СДСМ.

На новинарско прашање како СДСМ планира да го реши овој проблем со Димовска, Станковиќ рече дека тие се обидувале преку пратенички прашања и се и сешто, меѓутоа дека проблемот не е во неа.

Станковиќ нагласи дека Димовска е само извршител на барањата на ВМРО-ДПМНЕ и на премиерот Груевски./крај/фо/мп