Свет
Албанската мафија ги назначува шефовите на подземјето во Македонија
Албанската мафија ги назначува шефовите на подземјето во Македонија, а македонските Албанци и нивните сонародници од Косово го раководат шверцот на дрога од Источна кон западна Европа.
ПОЛИЦИСКИ БОРД НА ДИРЕКТОРИ ТВРДИ
Албанската мафија ги назначува шефовите на подземјето во Македонија, а македонските Албанци и нивните сонародници од Косово го раководат шверцот на дрога од Источна кон западна Европа. Станува збор за официјална информација соопштена на состанок на Бордот на директорите на меѓународната полициска организација со седиште во Њујорк.
Италијанската полиција во минатата недела во Милано го уапсила Метуш Бирами (47) македонски наркобос, кој имал и бугарски пасош. Со неговото апсење завршила двегодишната меѓународна операција против мафијата и шверцот со дрога во западна Европа. Полицијата ја следела продажбата на 500 килограми кокаин низ Европа, а притоа биле уапсени десет албански наркошверцери, кои рекетирале, ограбувале и малтретирале богати италијански семејства.
Според Марко Ницовиќ, член на Бордот и поранешен шеф на белградската полиција, албанската мафија ја уредува “кадровската политика” во подземјето на Србија, Босна и Херцеговина, Хрватска и Словенија.
Албанската мафија го зазема третото место во светот, и се проценува дека во Европа дејствува со околу 15.000 члена. Тие годишно заработуваат помеѓу 400 и 500 милиони американски долари. За да заработи уште повеќе пари, албанската мафија изнајмува врвни економисти, кои ги советуваат босовите во кои бизниси е нејпрофитабилно да ги вложуваат парите заработени во бизнисот со дрога и трговијата со луѓе.
Во Бордот на меѓународната полициска организација сметаат дека Босна и Херцеговина станува складиште на дрогата од каде што таа се пренсува низ Европа. Пратките со дрога одат од Турција преку Санџак, северна Црна Гора кон БиХ и Хрватска и понатаму кон запад. Друг начин на префрлување на дрогата е преку автопати што водат кон Западна Европа преку Словенија.
Според Ницовиќ, кога ќе се каже Албанци, се мисли на Албанците од Косово и од западна Македонија. Криминалците од Република Албанија се само нивни сиромашни роднини и сервис. Косовската и македонската албанска мафија купиле многу недвижности во Албанија: пристаништа, магацини, хотели и фабрики.
Италијанската полиција неодамна утврдила поврзаност помеѓу кинеската и албанската мафија, а најмногу во нелегалната имиграција. Ова го посочи Дирекцијата за антимафија во Фиренца, според која постои организиран канал за трговија со нелегални кинески имигранти.
Каналот се протега од Пекинг до италијанскиот град Анкона и минува низ Грција и Албанија. При пристигнувањето во Албанија, повеќето од имигрантите биле принудно задржани од групи, поврзани со локалната мафија. Откако ќе го плателе откупот, тие биле испраќани во Италија. Според полицијата двете банди работеле заедно и при купувањето на оружје, кокаин и екстази.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Хезболах лансира ракети врз северен Израел
Хезболах лансира 140 ракети кон северниот дел на Израел, само еден ден откако лидерот на екстремистичката група, Хасан Насрала, најави одмазда за серијата експлозии во Либан во последните три дена.
Израелската армија објави дека ракетите паднале во три брана во петокот попладне, а цел биле места по должината на разурнатата граница со Либан, пренесува „Јутарњи“.
Хезболах соопшти дека цели биле неколку места по должината на границата со ракетите „Катјуша“, вклучително и неколку бази за противвоздушна одбрана, како и штабот на израелската оклопна бригада, која, според нив, била првиот погоден, пренесува „Н1 Загреб“.
Хезболах рече дека ракетите биле како одмазда за израелските напади врз села и домови во јужен Либан.
Свет
Камала Харис: Ако некој упадне во мојот дом, ќе биде застрелан
Потпретседателката на САД, Камала Харис, изјави дека е подготвена да употреби пиштол доколку натрапник упадне во нејзиниот дом.
„Ако некој упадне во мојата куќа, ќе биде застрелан“, рече Харис, гостинка на Опра Винфри.
„Веројатно не требаше да го кажам тоа, но мојот персонал подоцна ќе се справи со тоа“, додаде таа и се насмеа. Харис, која потврди дека поседува пиштол за време на неодамнешната претседателска дебата, ја повтори својата поддршка за забраната на автоматските пушки.
„Огненото оружје од овој тип е буквално дизајнирано да биде воено средство. За него нема место на улиците на граѓанското општество“, нагласи таа.
Рече дека е поддржувач на американскиот втор амандман кој го штити правото на поседување оружје, но се осврна и на американскиот проблем со престрелките во училиштата.
Таа предупреди дека е вознемирувачко што децата мораат да поминат вежби за да се подготват за вакви инциденти. „Не мора да биде така“, убедена е таа. По едно од најновите масовни престрелки во САД, 14-годишно момче е обвинето за убиство на четири лица во средно училиште во Џорџија.
„Поседувам пиштол веројатно од истата причина како и многумина кои го имаат – поради лична безбедност. Бев обвинител“, рекла Харис во 2019 година, според Би-Би-Си.
За време на минатонеделната дебата со републиканскиот кандидат Доналд Трамп, таа ги негираше обвинувањата на Трамп дека „ќе им го одземе пиштолот на сите“ доколку биде избрана во Белата куќа.
Трамп поседуваше и три пиштоли, но мораше да предаде два од нив и да се соочи со ограничувања за третиот откако беше обвинет.
Регион
Додик: Нема да ја почитувам одлуката на Уставниот суд
Српскиот лидер во Босна и Херцеговина, Милорад Додик, изјави дека нема да ја почитува одлуката на Уставниот суд на таа земја, кој го оспори изборниот закон за ентитетите, и покрај тоа што неговата партија ќе учествува на претстојните локални избори, кои се одржуваат според одредбите на друг државен изборен закон.
„Изборниот закон на Република Српска е уставен и овој правен акт ќе се применува“, изјави Додик за Радио телевизија на Република Српска, реагирајќи на вчерашната одлука на Уставниот суд на Босна и Херцеговина.
Тој суд оцени дека со донесувањето на Изборниот закон на Република Српска е прекршен Уставот на Босна и Херцеговина. На овој начин се оспорува улогата на Централната изборна комисија на БиХ, која е задолжена за организирање и спроведување на изборите.
На ваков потег се одлучија откако високиот меѓународен претставник Кристијан Шмит наметна измени во изборниот законик на Босна и Херцеговина.
Сепак, Додик тврди дека само ќе го почитува Изборниот законик за ентитетите бидејќи тој не бил оспорен од Уставниот суд на Република Српска. Но, државниот е.
И покрај приговорите и отфрлањето на одлуките на Уставниот суд на БиХ, кои властите на Република Српска ги нарекуваат скратени затоа што двајца српски судии не учествуваат во неговата работа, партиите на власт од тој ентитет сепак ќе учествуваат на претстојните локални избори организирани од државната Централна изборна комисија.
Овие избори ќе се одржат на 6 октомври, а ќе се изберат нови свикувања на градските и општински совети и раководители на 141 општина и град.