Министерот за европски прашања Орхан Муртезани и амбасадорот и шеф на Делегацијата на Европската Унија во Република Северна Македонија, Михалис Рокас, одржаа заедничка прес-конференција на која ги презентираа главните аспекти од Планот за раст за Западен Балкан и Реформската агенда 2024-2027 за Северна Македонија.

Рокас ја нагласи силната поддршка од Европската Унија преку конкретни финансиски и стратешки мерки кои ќе овозможат забрзување на реформите, подобрување на социо-економските услови и приближување на Северна Македонија кон членството во ЕУ.

Муртезани се осврна на значењето на јасната, транспарентна и ефективна комуникација со граѓаните, претставувајќи го Планот за комуникација и видливост на Планот за раст за Западен Балкан и Реформската агенда 2024 – 2027 на Северна Македонија кој е наменет за зголемување на довербата во реформските процеси и поголема видливост на конкретните придобивки од евроинтегративниот процес.

Преку овој План, граѓаните, рече Муртезани, ќе можат јасно да ги согледаат конкретните резултати и ефекти на реформите – од подобрување на деловното окружување и отворање нови работни места, до поголема економска конкурентност и зајакнати демократски институции.

Оценува дека на овој начин, Планот не само што ќе ја зголеми видливоста на активностите што ги реализираме со помош на ЕУ, туку и ќе ја засили довербата на граѓаните во реформскиот процес и во самата европска иднина на нашата држава.

Според него, тој е политичка порака дека Северна Македонија сериозно и одговорно чекори напред кон својата европска иднина.

Има три јасни и важни столбови, нагласи министерот.

Првиот е лесниот пристап до јасни и точни информации. За таа цел, ќе креираме специјализирана онлајн платформа, која ќе биде централна точка за следење на сите активности, напредок и резултати од реформите. Оваа платформа ќе обезбедува транспарентност и ќе овозможи директна комуникација помеѓу институциите и јавноста.

Вториот елемент е активното вклучување на граѓаните и сите релевантни засегнати страни во процесот на реформите. Преку јавни настани, дискусии и медиумски кампањи, ќе овозможиме двонасочна комуникација што ќе поттикне отворен дијалог и ќе изгради силно партнерство меѓу институциите и граѓаните.

Третиот столб е препознатливоста и конзистентноста во комуникацијата преку единствен визуелен идентитет. Со развој на јасно лого, шема на бои и визуелен бренд, ќе обезбедиме дека секоја активност поврзана со реформите и Планот за раст е лесно препознатлива и ја носи пораката за нашите заеднички европски вредности и цели.

Системот ЕТИАС, кој ќе се применува за влез во земјите од Европската Унија, повторно е одложен и ќе почне на крајот на 2026 година, а целосната примена се очекува во април 2027 година.

Ова е трето одложување на примената на овој систем. Системот првично беше најавено дека ќе се применува од почетокот на 2022 година, а последниот датум беше мај 2025 година.

И македонските граѓани ќе треба да аплицираат за ЕТИАС за влез во земјите членки на ЕУ на краткорочна основа, под 90 дена, за туризам, деловни, транзитни или медицински цели.

Програмата ЕТИАС ќе биде во сила од четвртиот квартал од 2026 година па наваму и е наменета за проверка на патниците што пристигнуваат од странство како одговор на глобалното зголемување терористички активности.

Програмата ЕТИАС беше одобрена во 2016 година и ќе бидат потребни четири години за да се развијат потребните системи, кои ќе се поврзат со постојните бази на податоци за имиграција и други безбедносни податоци за да се обезбеди нова алатка за проверка во европските земји.

Во четвртиот квартал од 2026 година граѓаните од Македонија ќе треба да пополнат апликација ЕТИАС пред да тргнат на пат, а тоа ги вклучува и патниците што само ќе транзитираат во ЕУ на пат до други дестинации.

Секој македонски државјанин што сака да влезе во ЕУ повеќе од 90 дена или за други цели, освен оние дозволени според програмата ЕТИАС, ќе треба да аплицира за шенген-виза. Дополнителни детали може да се најдат со посета на https://etias.com/ и користејќи ја процената на почетната страница.

Се препорачува македонските граѓани да ја пополнат својата апликација ЕТИАС 96 часа пред датумот на нивното поаѓање. Целосните детали може да се најдат со посета на страницата.

Македонските граѓани може да очекуваат нивната апликација за ЕТИАС нормално да биде обработена и одобрена во рок од неколку минути, а овластувањето ќе се испраќа по е-пошта во форма на ПДФ-документ. Нема потреба да се печатат или презентираат какви било документи бидејќи ЕТИАС се чува електронски, стои во информацијата на страната за системот.

Како дел од „Програмата за спроведување на општи мерки за заштита на населението од заразни болести“ од 2025 година, извршена е редовна пролетна дератизација за уништување на глодари на 1073 шахти. А во тек е и спроведување на дезинфекција на јавни објекти на површина од 3300 м2, меѓу кои е општинската зграда, како и домовите на култура на општина Илинден.

Во насока на спречување и сузбивање на заразни болести и инфекции, општина Илинден известува дека и во наредниот период ќе продолжи со примена на сите потребни мерки за заштита на населението.