Владејачката ВМРО-ДПМНЕ вчерашниот настап во Прилеп на лидерот на опозициската СДСМ, Бранко Црвенковски го оцени како најпразен говор во неговата политичка кариера, а митингот како целосно потфрлање на партијата.

Владејачката ВМРО-ДПМНЕ вчерашниот настап во Прилеп на лидерот на опозициската СДСМ, Бранко Црвенковски го оцени како најпразен говор во неговата политичка кариера, а митингот како целосно потфрлање на партијата.

„Бранко Црвенковски вчера го одржа својот најпразен говор во политичката кариера и доби црвен картон од граѓаните на Прилеп и од граѓаните на Македонија. Тоа беше говор кој беше насочен исклучиво за пресметка со внатрепартиските опоненти каде тој „демократски” им нареди на членовите на СДСМ дека треба него и само него да го слушаат“, изјави денеска Влатко Ѓорчев од ВМРО-ДПМНЕ.

Според него Црвенковски не понудил никакви проекти и решенија кои што можат да ги подобрат состојбите во РМ.

„Тој во неговиот говор и во неговите настапи не кажува ниту еден проект што ќе го реализира, нема ниту едно решение за состојбите во Македонија, туку само говор на поделби и говор во кој што сака да демонстрира сила во внатрепартиските редови во СДСМ“ , рече Ѓорчев.

Албанската владејачка партија ДУИ по вчерашниот митинг апелираше до сите политички субјекти да внимаваат на вокабуларот.

„Јас би повикал и би апелирал до сите релевантни политички фактори и политички партии во Македонија дали се опозициски или од власта, да внимаваат на нивниот вокабулар, особено пред овој условно кажано критичен период, кога очекуваме извештај од ЕК и пред самитот на НАТО, да внимаваат во нивните етикетирања едни спрема други, да бидеме позрели политички и поодговорно институционално и државнички и да покажеме дека Македонија има одговорни политичари“, изјави Сафет Незири од ДУИ.

И според либералдемократот Андреј Жерновски говорот на Црвенковски бил празен говор кој не може да смени ништо.

„Вчерашниот настап на Црвенковски е уште една потврда на ставот на ЛДП, дека токму тој претставува кочничар на што побрзото заминување на Груевски, огромно незадоволство постои, граѓаните сакаат да видат смена на оваа штетна политика на Груевски но, тоа не може да се направи со веќе слушнати празни говори“, изјави Жерновски.

Според него треба друга политичка платформа која како што рече се спротивстави на штетната политика.

Од Нова демократија сметаат дека преку митингот граѓаните можеле да го искажат незадоволството од креирањето и реализирањето на политиките на Владата.

„СДСМ има легитимно право да организира мирни протести, преку кои ќе го искаже незадоволството на граѓаните во однос на креирањето и реализирањето на политиките на оваа Влада, но и со тоа да побара смена на истата“, рече Фора Кадриу од Нова демократија.

Црвенковски вчера од Прилеп порача дека не се откажува од политиката и од СДСМ и дека од овој град ја почнува битката со како што рече лажниот патриотизам./крај/бд